កំពង់ស្ពឺៈ យោងតាមផេក អគ្គស្នងការដ្ឋាននគរបាលជាតិ បានឲ្យដឹងថា បុរសម្នាក់ដែលគេស្គាល់ថា ជាជនអនាថា(មនុស្សវិបល្លាសស្មារតី) ត្រូវបានប្រទះឃើញដេកស្លាប់នៅលើកំណាត់ផ្លូវជាតិលេខ៥១ (២២-២៣) ត្រង់ចំណុចភូមិពោធិ៍ ឃុំដំណាក់រាំង ស្រុកឧដុង្គ ខេត្តកំពង់ស្ពឺ ថ្ងៃទី១៧ ខែកុម្ភៈ ឆ្នាំ២០២១ វេលាម៉ោង៥និង០០នាទីព្រឹក ។
សមត្ថកិច្ចបានឲ្យដឹងថា បន្ទាប់ពីមានប្រជាពដ្ឋរាយការណ៍ពាក់ព័ន្ធករណីខាងលើ សមត្ថកិច្ចទៅដល់ពិតជាឃើញមានសាកសពបុរសម្នាក់ អាយុប្រហែលជាង៣០ឆ្នាំ ដែលប្រជាពលរដ្ឋនៅទីនោះស្គាល់ថា ជាជនអនាថាដែលមួយរយ:ពេលនេះតែងតែឃើញគាត់ដើរទៅវិញទៅមករាល់ថ្ងៃនៅទីនោះ ។
តាមការសន្និដ្ឋានរបស់សមត្ថកិច្ច គឺមិនដឹងពីម៉ោងកើតហេតុនោះទេថ្ងៃទី១៧ ខែកុម្ភ: ឆ្នាំ២០២១ ជនរងគ្រោះត្រូវបានរថយន្តមិនស្គាល់ម៉ាក អ្នកបើកបរមិនស្គាល់អត្តសញ្ញាណ (បើករត់គេចបាត់) បើកបុកបណ្តាលឱ្យស្លាប់នៅនឹងកន្លែងតែម្តង។
ចំពោះសពជនរងគ្រោះ តម្កល់ទុកនៅក្នុងវត្តបញ្ញាមហាព្រហ្ម ឃុំដំណាក់រាំង ស្រុកឧដុង្គ ខេត្តកំពង់ស្ពឺ រង់ចាំសាច់ញាតិមកទទួលដើម្បីយកទៅធ្វើបុណ្យតាមប្រពៃណី ៕
មតិយោបល់