ភ្នំពេញៈ បុរសវ័យចំណាស់ម្នាក់ ខណៈពេលដែលកំពុងតែចុះពីបន្ទប់ជួលទៅរកទិញបបរហូប ស្រាប់តែវិលមុខដួលស្លាប់ភ្លាមភ្លាមបង្កការភ្ញាក់ផ្អើល កាលពីវេលាម៉ោង ១០និង៤០នាទីព្រឹក ថ្ងៃទី១៩ ខែមីនា ឆ្នាំ២០២១ ទីតាំងកន្លែងកើតហេតុ ស្ថិតនៅផ្លូវបេតុងភូមិត្រពាំងថ្លឹង១ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ។

សពជនរងគ្រោះមានឈ្មោះ សាន់ ណូក ភេទប្រុស អាយុ ៥១ឆ្នាំ មុខរបរសន្តិសុខ ស្នាក់នៅបន្ទប់ជួលក្បែរកន្លែងកើតហេតុ។ មានស្រុកកំណើតនៅភូមិព្រៃដើមថ្នឹងទី១ ឃុំព្រៃដើមថ្នឹង ស្រុកស៊ីធរកណ្ដាល ខេត្តព្រៃវែង។

តាមប្រភពព័ត៌មានពីប្រជាពលរដ្ឋ ដែលបានឃើញហេតុការណ៍បានឱ្យដឹងថា មុនពេលកើតហេតុគេឃើញបុរសជាជនរងគ្រោះខាងលើ បានចុះពីបន្ទប់ជួលទៅរកទិញបបរដើម្បីហូប ប៉ុន្តែស្រាប់តែមកដល់ចំណុចកើតហេតុ មានអាការៈវិលមុខដួលភ្លាមនោះក៏មានប្រជាពលរដ្ឋព្យាយាមជួយដែរ ប៉ុន្តែអកុសលជនរងគ្រោះបានស្លាប់បាត់ទៅហើយ ក្រោយពេលកើតហេតុក៏បានរាយការណ៍ទៅសមត្ថកិច្ចជំនាញកោសល្យវិច័យនឹងទាក់ទងទៅបងប្អូនសាច់ញាតិ។

បច្ចុប្បន្នសពត្រូវបងប្អូនសាច់ញាតិយកទៅធ្វើបុណ្យនៅវត្តឬស្សីសាញ់តាមប្រពៃណី៕