ពោធិ៍សាត់: យោងតាមផេកការិយាល័យផ្សព្វផ្សាយតាមបណ្តាញសង្គមបានឲ្យដឹងថា កាលពីថ្ងៃទី២៤ ខែមិនា. ឆ្នាំ២០២១ ម៉ោង ១៥និង៤៥ នាទី មានករណីគ្រោះថ្នាក់ចរាចរណ៍រវាងរថយន្តនិងម៉ូតូដែលកំពុងធ្វើដំណើរស្របទិសគ្នាពីត្បូងទៅជើង នៅកំណាត់ផ្លូវជាតិលេខ១០ ស្ថិតក្នុងភូមិឆាយលូក ឃុំអូរសោម ស្រុកវាលវែង បណ្តាលឲ្យបុរសម្នាក់រងរបួសធ្ងន់ និងខូចខាតម៉ូតូ១គ្រឿង បង្កឲ្យមានការភ្ញាក់ផ្អើលដល់ប្រជាពលរដ្ឋ និងសមត្ថកិច្ចចុះពិនិត្យដល់កន្លែងកើតហេតុ។
សាក្សីនៅកន្លែងកើតហេតុបានឲ្យដឹងថា មុនពេលកើតហេតុគេបានឃើញរថយន្តម៉ាក SHACMAN ពណ៌ស ពាក់ស្លាកលេខ AT21 3-1602 បើកបរដោយឈ្មោះ ធី រតនា ភេទប្រុស អាយុ ២៦ឆ្នាំ មុខរបរបើកបររថយន្តដឹកដី សាងសង់ផ្លូវជាតិលេខ១០ ស្នាក់នៅភូមិឃុំខាងលើ លុះដល់ចំណុចកើតហេតុបានបត់ទៅខាងស្តាំដោយគ្មានការប្រុងប្រយ័ត្ន ហើយបានកៀហើយកិនម៉ូតូម៉ាក WAVE ពណ៌ខ្មៅ គ្មានស្លាកលេខ បើកបរដោយឈ្មោះ ថន ចម្រុង ភេទប្រុស អាយុ ៤៦ឆ្នាំ មុខរបរកសិករ(របួសធ្ងន់)បញ្ជូនទៅមន្ទីរពេទ្យខេត្តពោធិ៍សាត់។
លោកវរសេនីយ៍ទោ ប៊ូ ង៉ែត អធិការរងនគរបាលស្រុកវាលវែងបានបញ្ជាក់ថា ក្រោយពីសមត្ថកិច្ចនគរបាលជំនាញចុះពិនិត្យដល់កន្លែងកើតហេតុរួច បានសន្និដ្ឋានថា ករណីគ្រោះថ្នាក់ចរាចរណ៍នេះបណ្តាលមកពីអ្នកបើករថយន្តបត់គ្មានការប្រុងប្រយ័ត្ន។
ចំពោះរថយន្តបង្ក និងម៉ូតូត្រូវបានយកមករក្សាទុកនៅប៉ុស្តិ៍នគរបាលរដ្ឋបាលអូរសោមដើម្បីកសាងសំណុំរឿងចាត់ការបន្តតាមនីតិវិធី៕
មតិយោបល់