ស្វាយរៀងៈ យោងតាមផេក អគ្គស្នងការដ្ឋាននគរបាលជាតិ បានឲ្យដឹងថា បុរសម្នាក់ត្រូវបានកម្លាំងនគរបាលព្រហ្មទណ្ឌ នៃស្នងការដ្ឋាននគរបាលខេត្តស្វាយរៀងឃាត់ខ្លួន ពាក់ព័ន្ធករណីហិង្សាដោយចេតនាមានស្ថានទម្ងន់ទោស ។
ករណីនេះកើតឡើងនៅថ្ងៃទី២៦ ខែមេសា ឆ្នាំ២០២១ វេលាម៉ោង៤និង៤៥នាទី នៅត្រង់ចំណុចភូមិតាត្រាវ ឃុំកំពង់ត្រាច ស្រុករមាសហែក ខេត្តស្វាយរៀង ។
ជនដៃដល់មានឈ្មោះ ខឹម ស៊ីន ភេទប្រុស អាយុ២៧ឆ្នាំ និងឈ្មោះ ស សេរីវុត្ថា ភេទប្រុស អាយុ២៧ឆ្នាំ ទាំង២នាក់រស់នៅភូមិក្រញូង ឃុំមុខដា ស្រុករមាសហែក ខេត្តស្វាយរៀង ។ បានធ្វើតេស្តរកសារធាតុញៀនលទ្ធផលវិជ្ជមាន (+) ទាំង២នាក់ ។
ជនដៃដល់បានរួមគ្នា ធ្វើសកម្មភាព ដោយប្រើដាវចុងស្រួច កាប់ទៅលើជនរងគ្រោះឈ្មោះ សាន់ វណ្ណា ភេទប្រុស អាយុ២៥ឆ្នាំ នៅភូមិត្រពាំងតាកែវ ឃុំជ្រៃធំ ស្រុករមាសហែក ខេត្តស្វាយរៀង បណ្តាលអោយរងរបួសក្បាល និងជើងខាងឆ្វេង ដោយសារមានទំនាស់នឹងគ្នាក្នុងពេលលក់ត្រី ។
បច្ចុប្បន្ន ជនរងគ្រោះកំពុងព្យាបាលនៅមន្ទីរពេទ្យបង្អែកស្រុករមាសហែក រីឯជនសង្ស័យទាំងពីរនាក់ ឃាត់ខ្លួននៅអធិការដ្ឋាននគរបាលស្រុករមាសហែក ដើម្បីកសាងសំណុំរឿង ចាត់ការតាមច្បាប់ ៕
មតិយោបល់