បន្ទាយមានជ័យ: យោងតាមផេកអគ្គស្នងការដ្ឋាននគរបាលជាតិបានឲ្យដឹងថា ក្មេងស្រីម្នាក់ក្នុងចំណោមក្មេងប្រុស ស្រី០៤នាក់ ទៅតាមឪពុកមាទៅរាវគ្រុំក្នុងស្ទឹងតែតែជាអកុលបានលង់ទឹកស្លាប់ ខណ:កំពុងឆ្លងទឹកត្រឡប់មកផ្ទះវិញ ។
ហេតុការណ៍ភ្ញាក់ផ្អើលនេះ បានកើតឡើងនៅវេលាម៉ោង០៥ល្ងាចថ្ងៃទី២៦ខែមិថុនា ឆ្នាំ២០២១ នៅចំណុចខាងកើតឈៀងខាងជើងចម្ងាយ៣០០ម៉ែត្រ ពីភូមិចារ ឃុំប្រាសាទ ស្រុកព្រះនេត្រព្រះ ខេត្តបន្ទាយមានជ័យ ។
លោកវរសេនីយ៍ឯក មាស ប្ញទ្ធី អធិការនគរបាលស្រុកព្រះនេត្រព្រះ បានឲ្យដឹងថា៖ក្មេងស្រីរងគ្រោះឈ្មោះ ធៀម ចរិយា ភេទស្រី អាយុ០៩ឆ្នាំ មានឪពុកឈ្មោះ សូ ប៊ុនថន អាយុ៤០ឆ្នាំ និងម្តាយឈ្មោះអៀ សុខូវ អាយុ៣៦ឆ្នាំ នៅភូមិសំពៅលូន ឃុំប្រាសាទស្រុកព្រះនេត្រព្រះ ខេត្តបន្ទាយមានជ័យ ។ មុនពេលកើតហេតុក្មេងរងគ្រោះរួមទាំងក្មេងប្រុសស្រីចំនួន០៣នាក់ទៀតជាបងប្អូន បានទៅនាំគ្នាតាមឪពុកមាទៅរាវគ្រុំក្នុងស្ទឹង ចម្ងាយពីភូមិប្រហែល៣០០ម៉ែត្រ ពេលនោះមានក្មេងរងគ្រោះ បានលង់ទឹកស្លាប់ខណ:ពេលឆ្លងទឹកស្ទឹងត្រឡប់មកវិញ ។
លោកអធិការបានបញ្ជាក់ថា៖ បើតាមការរៀបរាប់បំភ្លឺឲ្យដឹងពីឈ្មោះ អៀ តុងវឿ ភេប្រុស អាយុ៣៣ឆ្នាំ នៅភូមិចារ ឃុំប្រាសាទ ស្រុកព្រះនេត្រព្រះ ខេត្តបន្ទាយមានជ័យ នៅមុនកើតហេតុវេលាម៉ោង១១ព្រឹកថ្ងៃទី២៦ ខែមិថុនា ខ្លួនបានត្រឡប់មកពីមើលលបប្រើសមួយរយ នៅផ្លូវលេខ៦៨ ខាងស្រុកកក្រឡាញ់ ខេត្តសៀមរាប ស្រាប់តែឃើញក្មួយៗទាំង៤នាក់មកលេងផ្ទះរបស់ខ្លួន ។
លុះដល់វេលាម៉ោងប្រហែល៣និង៣០នាទីរសៀល ខ្លួនបានយកឆ្នាំងធំមួយដើម្បីទៅរាវគ្រុំនៅក្នុងស្ទឹងខាងកើតភូមិ ហើយក្មេងៗទាំង៤នាក់ ដែលត្រូវជាក្មួយនោះបានរត់តាមទៅជាមួយ ។ ពេលកំពុងរាវគ្រុំពួកក្មេងៗទាំងនោះក៏បានចុះមុជទឹកលេង និងជួយរាវគ្រុំខ្លួន ក្រោយមកខ្លួនបានឆ្លងទៅរាវគ្រុំនៅកន្លែងផ្សេងទៀត ដោយពួកក្មេងៗទាំងនោះក៏ឆ្លងទៅជាមួយខ្លួនដែរ ដោយឆ្លងទឹកជ្រៅ ខ្លះក៏តោងឆ្នាំង ខ្លះទៀតជិះកខ្លួន ពេលរាវគ្រុំបានមួយសន្ទុះធំ ក៏នាំគ្នាហែលឆ្លងមកវិញដោយពួកក្មេងៗហែលតោងឆ្នាំងនៅក្បែរខ្លួន ។ ពេលឆ្លងមកដល់កណ្ដាលស្ទឹងក៏លិចឆ្នាំងដាក់គ្រុំនោះ ឃើញដូចនោះខ្លួនបានស្រវ៉ាចាប់អោបពួកក្មួយៗបានចំនួន០៣នាក់យកមកដាក់នៅលើគោកហើយយបាត់ក្មួយស្រីម្នាក់ទៀតឈ្មោះ ធៀម ចរិយា ខ្លួនក៏បានស្ទុះទៅមុជរាវមកភ្លាមៗតែមិនឃើញដោយទឹកជ្រៅផង ហើយខ្លួនបានរត់មកប្រាប់បងប្អូនក្នុងភូមិឲ្យទៅជួយមុជរក ។ ចំណែកខ្លួនបានជិះម៉ូតូមកប្រាប់ឪពុកម្ដាយក្មេងរងគ្រោះនៅភូមិសំពៅលូន ឃុំប្រាសាទ ។ពេលត្រឡប់ទៅវិញទើបរាវរកឃើញសពក្មេងរងគ្រោះ នៅវេលាម៉ោង០៥ល្ងាច ថ្ងៃដដែល ហើយបាននាំគ្នាធ្វើចលនាតែក្មេងរងគ្រោះនៅតែមិនដឹងខ្លួន ។ ដោយមិនអស់ចិត្ត ឪពុកម្តាយក្មេងរងគ្រោះ បានដឹកតាមម៉ូតូទៅមណ្ឌលសុខភាពសំពៅលូនអង់រីកូរ នៅភូមិសំពៅលូន ឃុំក្រឡាញ់ ស្រុកក្រឡាញ់ ខេត្រសៀមរាប ហើយពេទ្យបានប្រាប់ថា ក្មេងនោះស្លាប់បាត់ហើយក៏ដឹកយកមកផ្ទះវិញ។
លោកអធិការបានបញ្ជាក់ថា៖ ឆ្លងតាមការត្រួតពិនិត្យរបស់ក្រុមការងារដែលមានសមាភាពនគរបាលផ្នែកពិនិត្យនិងវិភាកកន្លែងកើតហេតុ នគរបាលផ្នែកព្រហ្មទណ្ឌ នគរបាលប៉ុស្តិ៍ប្រាសាទ គ្រូពេទ្យមណ្ឌលសុខភាពឃុំ ប្រាសាទ-ក្រុមប្រឹក្សាឃុំប្រាសាទ-លោកមេភូមិសំពៅលូន និងឪពុកម្ដាយរបស់សាកសព បានសន្និដ្ឋានថា ឈ្មោះធៀម ចរិយា មិនមានស្លាកស្នាមដែលពាក់ព័ន្ធទៅនឹងអំពើឃាតកម្មទេ ដូច្នេះការស្លាប់នេះអាចស្លាប់ដោយសារលង់ទឹកប្រាកដមែន និងបានប្រគល់សពឲ្យឪពុកម្តាយរៀបចំធ្វើបុណ្យតាមប្រពៃណី ៕
មតិយោបល់