ព័ត៌មានជាតិ

ឥទ្ធិពលព្យុះទី៧ ដៀនមុ នឹងបង្កឲ្យមានភ្លៀងធ្លាក់ខ្លាំងនៅកម្ពុជា ពីថ្ងៃទី២១-២៦សីហា

ភ្នំពេញ: ឥទ្ធិពលរបស់ព្យុះទី៧ ឈ្មោះ ដៀនមុ (DIANMU) នឹងធ្វើឲ្យមានភ្លៀងធ្លាក់ច្រើន ទាំងក្នុងអាងទន្លេមេគង្គ និងក្នុងព្រះរាជាណាចក្រកម្ពុជា តំបន់ឆ្នេរ និងលើផ្ទៃសមុទ្រ ព្រមទាំងមានខ្យល់បក់បោកខ្លាំង និងរលកខ្ពស់ៗ។ នេះបើតាមប្រកាសព័ត៌មានរបស់ក្រសួងធនធានទឹកមុននេះបន្តិច។

សេចក្ដីប្រកាសព័ត៌មាន នៅរសៀលថ្ងៃទី១៨ ខែសីហានេះ ឲ្យដឹងថា វិសម្ពាធទាបដែលបានកើតនៅលើភាគឦសាន្តកោះហៃណាំ ប្រទេសចិន កាលពីថ្ងៃទី១៧ ខែសីហានោះ នៅម៉ោង៧ព្រឹក ថ្ងៃទី១៨ ខែសីហានេះ បានវិវត្តទៅជាព្យុះទី៧ ឈ្មោះ ដៀនមុ (DIANMU) ស្ថិតនៅលើកោះហៃណាំ ភាគខាងជើង។ តាមការព្យាករ ព្យុះនេះនឹងបន្តដំណើរទៅដល់ឆ្នេរប្រទេសវៀតណាម ខាងកើតក្រុងហាណូយ នៅយប់ថ្ងៃទី១៩ ខែសីហា។

លក្ខណ:បែបនេះ នឹងធ្វើឲ្យអាកាសធាតុនៅលើអាងមេគង្គ នឹងមានភ្លៀងធ្លាក់ច្រើន ចាប់ពីថ្ងៃទី២០ ដល់ថ្ងៃទី២៥ ខែសីហា បង្កឲ្យទឹកទន្លេហក់ឡើងជាបន្តបន្ទាប់។ ដោយឡែក នៅព្រះរាជាណាចក្រកម្ពុជា ចាប់ពីថ្ងៃទី១៨ ដល់ថ្ងៃទី១៩ ខែសីហា អាចនឹងមានភ្លៀងធ្លាក់ពីតិចទៅមធ្យម និងចាប់ពីថ្ងៃទី២១ ដល់ថ្ងៃទី២៦ ខែសីហា អាចនឹងមានភ្លៀងធ្លាក់ច្រើនរាយប៉ាយ នៅក្នុងក្របខ័ណ្ឌស្ទើរទូទាំងប្រទេស។

តំបន់ឆ្នេរសមុទ្រ និងលើផ្ទៃសមុទ្រ៖ អាចនឹងមានខ្យល់បក់បោកខ្លាំង និងរលកសមុទ្រខ្ពស់ៗ ចាប់ពីថ្ងៃទី២០ ដល់ថ្ងៃទី២៥ ខែសីហា៕

14021517_514015762123668_7141146905533392410_n

14067681_514015768790334_2208490935331276089_n

មតិយោបល់