-

ទំនិញខូចគុណភាព និងហួសកាលបរិច្ឆេទប្រើប្រាស់ប្រមាណជាង ៧តោន ត្រូវបានរៀបចំពិធីកម្ទេចចោល

ពោធិ៍សាត់: យោងតាមផេកអគ្គ.ការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ CCF បានឲ្យដឹងថា នៅព្រឹកថ្ងៃទី០៥ ខែវិច្ឆិកា ឆ្នាំ២០២១ មន្រ្តីអគ្គនាយកដ្ឋានក.ប.ប. ប្រចាំខេត្តពោធិ៍សាត់ បានរៀបចំពិធីកម្ទេចចោលទំនិញខូចគុណភាព និងហួសរយ:ពេលប្រើប្រាស់ចំនួន ៧ ២០០ គីទ្បូក្រាម នៅក្នុងបរិវេណពហុកីទ្បាដ្ឋានខេត្តពោធិ៍សាត់ ស្ថិតក្នុងក្រុងពោធិ៍សាត់ ខេត្តពោធិ៍សាត់។ ពិធីនេះត្រូវបានរៀបចំឡើងក្រោមអធិបតីភាពលោកស្រី ម៉ែន ផល្លី អភិបាលរងខេត្ត និងជាដំណាងដ៏ខ្ពង់ខ្ពស់ ឯកឧត្ដម ជាវ តាយ អភិបាលនៃគណ:អភិបាលខេត្ត លោក ប៊ុង តាំងទី ព្រះរាជអាជ្ញារងអមសាលាដំបូងខេត្ត លោកស្រី ឈុន សេរីរ័ត្ន ប្រធានមន្ទីរពាណិជ្ជកម្មខេត្តពោធិ៍សាត់។

សូមបញ្ជាក់ថា ទំនិញខូចគុណភាព និងហួសរយ:ពេលប្រើប្រាស់ ដែលភាគច្រើនជាម្ហូបអាហារ និងភេសជ្ជ:ទាំងនេះ ត្រូវបានមន្រ្តីជំនាញសាខាក.ប.ប. ប្រចាំខេត្តពោធិ៍សាត់ ធ្វើការត្រួតពិនិត្យ និងដកហូតពីតាមបណ្តាផ្សារ និងឃ្លាំងស្តុកទំនិញនានា ក្នុងភូមិសាស្ត្រខេត្តពោធិ៍សាត់ក្នុងរយ:ពេលកន្លងមកនេះ៕

មតិយោបល់