បាត់ដំបងៈ យោងតាមផេក អគ្គស្នងការដ្ឋាននគរបាលជាតិ បានឲ្យដឹងថា កាលពីថ្ងៃទី២៩ ខែវិច្ឆិកា ឆ្នាំ២០២១ វេលាម៉ោង២០និង៤៥នាទី លើផ្លូវលេខ៥៧បេ១ ចំណុចក្រុមទី១០ ភូមិទួលក្រសាំង ឃុំក្ដុលតាហែន ស្រុកបវេល មានករណីគ្រោះថ្នាក់ចរាចរណ៍ មួយកើតឡើង រវាងគោយន្តកន្ត្រៃសណ្ដោងរ៉ឺម៉កនិងម៉ូតូ បណ្តាលអោយយុវជនម្នាក់ស្លាប់បាត់បង់ជីវិតនិងម្នាក់ទៀតរងរបួសស្រាល ។
លោកវរសេនីយ៍ឯក សុខ សារិន អធិការនគរបាលស្រុកបវេល បានអោយដឹងថា មានគោយន្តកន្ត្រៃសណ្ដោងរ៉ឺម៉ក (អ្នកបើករត់គេចខ្លួនបាត់) បានបើកគោយន្តកន្ត្រៃក្នុងទិសដៅពីជើងទៅត្បូង លុះដល់កន្លែងកើតស្រាប់តែមានម៉ូតូ ០១គ្រឿង បើកបរក្នុងទិសដៅស្របទិសគ្នា បានមកបុកចំពីក្រោយគោយន្តកន្ត្រៃផ្នែកខាងឆ្វេងបណ្ដាលឱ្យដួល (ស្លាប់) នៅកន្លែងកើតហេតុ។
ម៉ូតូខាងលើ មានម៉ាកស្គូបពី ធុនសេ១១០ ពណ៌ឈាមជ្រូក ពាក់ស្លាកលេខ 1R-4800 បាត់ដំបង បើកបរដោយឈ្មោះ ម៉ៅ កៅឡាយ ភេទប្រុស អាយុ២៤ឆ្នាំ មានទីលំនៅភូមិក្ដុលក្រោម ឃុំក្ដុលតាហែ ស្រុកបវេល ខេត្តបាត់ដំបង (ស្លាប់នៅកន្លែងកើតហេតុ) និងអ្នករួមដំណើរ ម៉ូតូឈ្មោះ ចុម ប៉ាប់ ភេទប្រុស អាយុ ២៣ឆ្នាំ មានទីលំនៅភូមិក្តុលក្រោម ឃុំក្ដុលតាហែន ស្រុកបវេល (រងរបួសស្រាល) ។
ករណីនេះ កម្លាំងនគរបាលជំនាញបានធ្វើការត្រួតពិនិត្យ និងវាស់វែងឃើញថា គោយន្តកន្ត្រៃសណ្ដោងរ៉ឺម៉កបើកបរនៅពេលយប់គ្មានភ្លើងបំភ្លឺ រីឯអ្នកបើកបរម៉ូតូបើកក្នុងល្បឿនលឿនមិនប្រុងប្រយ័ត្ន (គ្មានមួកសុវត្ថិភាព) ។
បច្ចុប្បន្ន សមត្ថកិច្ចបានដកហូតមធ្យោបាយបង្កទាំងពីរ យកមករក្សាទុកនៅអធិការដ្ឋាននគរបាលស្រុក ដើម្បីរង់ចាំចំណាត់ការតាមផ្លូវច្បាប់។ ចំណែកសាកសពជនរងគ្រោះ សមត្ថកិច្ចបានប្រគល់ជូនក្រុមគ្រួសារ យកទៅធ្វើបុណ្យតាមប្រពៃណី ៕
មតិយោបល់