កណ្ដាលៈ យោងតាមផេក អគ្គស្នងការដ្ឋាននគរបាលជាតិ បានឲ្យដឹងថា ជនសង្ស័យម្នាក់ ត្រូវសមត្ថកិច្ចស្រុកលើកដែកឃាត់ខ្លួនយកមកអធិការដ្ឋាននគរបាលស្រុក ដើម្បីចាត់ការតាមច្បាប់ ករណីហិង្សាដោយចេតនា កាលពីថ្ងៃទី១៥ ខែធ្នូ ឆ្នាំ២០២១ វេលាម៉ោង១៧និង១០នាទី នៅចំណុចមុខផ្ទះឈ្មោះ ក្រែង ស្ថិតនៅក្នុងភូមិអំពិលទឹក ឃុំកំពង់ភ្នំ ស្រុកលើកដែក ខេត្តកណ្ដាល ។
មន្ត្រីនគរបាលស្រុកលើកដែក បានឲ្យដឹងថា ជនរងគ្រោះឈ្មោះ ឃុន សុភាព ភេទប្រុស អាយុ៣១ឆ្នាំ ។ ចំណែកជនសង្ស័យឈ្មោះ សួន សាវឿន ភេទប្រុស អាយុ៥០ឆ្នាំ ជនជាតិខ្មែរ មុខរបរ ជាងសំណង់ ។ ជនសង្ស័យនិងជនរងគ្រោះមានទីលំនៅភូមិ អំពិលទឹក ឃុំកំពង់ភ្នំ ស្រុកលើកដែក ខេត្តកណ្តាល ។
វត្ថុតាងចាប់យកមាន៖ ក្រមាចំនួន០១, ដាវដងដែកផ្លែដែកប្រវែង ០,៦៦ ម៉ែត្រចំនួន០១ ដើម, ម៉ូតូ C១០០ កូរ៉េ ពណ៌ក្រហមស្លាកលេខ កំពង់ឆ្នាំង 1F-6995 ចំនួន០១គ្រឿង ។
ប្រភពដដែលបន្តថា នៅមុនេពេលកើតហេតុ ជនរងគ្រោះឈ្មោះ ឃុន សុភាព អង្គុយផឹកស្រានៅផ្ទះអ្នកជិតខាងជាមួយបក្ខពួករបស់ខ្លួន ខណៈកំពុងផឹក ភ្លាមនោះស្រាប់តែជនសង្ស័យបានជិះម៉ូតូមកកន្លែងវង់ផឹកស៊ី ដោយឃើញជនសង្ស័យមកកន្លែងផឹក ជនរងគ្រោះក៏បានផុចស្រា អោយជនសង្ស័យផឹក តែជនសង្ស័យមិនផឹកទេ បែរជាពោលពាក្យថា អញកាប់អ្ហែងឥឡូវហើយ ។ បន្ទាប់ពីពោលពាក្យរួច ជនសង្ស័យក៏ជិះម៉ូតូចេញទៅបាត់ លុះបានមួយសន្ទុះក្រោយមក ក៏ត្រឡប់មកវិញ ដោយយកដាវមកជាមួយមកដល់វង់ផឹក ជនសង្ស័យឈប់ម៉ូតូហើយទាញដាវកាប់ ទៅលើជនរងគ្រោះ១ដាវចំលើថ្ងាសខាងឆ្វេងដោយពុំដឹងមូលហេតុ បណ្តាលអោយរបួសដាច់ចេញឈាម ដេរចំនួន០៨ថ្នេរ ហើយជនសង្ស័យបានបោះពាក្យថា ត្រូវប៉ុណ្ណឹងវាមិនងាប់ទេ និយាយរួចជនសង្ស័យបានយកក្រមា រុំដាវដាក់លើម៉ូតូជិះគេចខ្លួន ទៅទិសខាងជើងបាត់ទៅ ។
ក្រោយពីទទួលបានព័ត៌មានភ្លាម កម្លាំងប៉ុស្តិ៍បានសហការជាមួយ ផ្នែកជំនាញនគរបាលយុត្តិធម៌ ចុះទៅដល់ទីតាំងកើតហេតុស្វែងរកជនបង្ក និងធ្វើការឃាត់ខ្លួនបាន រួចបញ្ជូនមកកាន់អធិការរដ្ឋាន ដើម្បីបន្តចាត់ការតាមនីតិវិធី ។
សូមបញ្ជាក់ថា ជនសង្ស័យធ្លាប់ត្រូវបានសមត្ថកិច្ច ហៅមកអប់រំណែនាំចំនួន០២លើក ហិង្សាក្នុងគ្រួសារ០១លើកនិងហិង្សាដោយចេតនា០១លើក ៕
មតិយោបល់