កំពតៈ នៅថ្ងៃទី០៨ ខែកក្កដា ឆ្នាំ២០២២ វេលាម៉ោង១២និង១៥នាទីថ្ងៃត្រង់ មានករណីគ្រោះថ្នាក់ចរាចរណ៍កើតឡើង១លើក នៅចំណុចខាងកើតប្រឡាយចំងាយ៥០ម៉ែត្រ ចន្លោះបង្គោលគីឡូម៉ែត្រលេខ ១៣៣-១៣៤ ស្ថិតក្នុងភូមិព្រៃថ្នង ឃុំព្រៃថ្នង ស្រុកទឹកឈូ ខេត្តកំពត លើផ្លូវជាតិលេខ៣ កំពត-ភ្នំពេញរវាងរថយន្តនិងម៉ូតូសណ្តោងរ៉ឺម៉ក មានទិសដៅស្របគ្នាពីកើតទៅលិច ។

ករណីគ្រោះថ្នាក់ចរាចរណ៍ខាងលើនោះ មានរថយន្តមួយគ្រឿងម៉ាក ហ៊ីយ៉ាន់ដាយ ពណ៌ស ពាក់ស្លាកលេខព្រះសីហនុ ៣A.៩៩៣៥ បើកបរមកពីទិសខាងកើតទៅទិសខាងលិច ។ លុះពេលមកដល់ត្រង់ចំណុចកើតហេតុ បានបុករ៉ឺម៉ក បើកបរស្របទិសគ្នាពីក្រោយពេញទំហឹង បណ្តាលអោយរថយន្តក្រឡាប់ផ្ងារជើងសង្កត់លើរ៉ឺម៉ក រួចអ្នកបើកបររថយន្តបង្ករត់គេចខ្លួនបាត់ ។ ចំណែកម៉ូតូរ៉ឺម៉ករងគ្រោះបើកបរដោយឈ្មោះ ជ័យ ចូ ភេទប្រុស អាយុ៤៩ឆ្នាំ រស់នៅភូមិទ្វារថ្មី ឃុំព្រៃថ្នង ស្រុកទឹកឈូ ខេត្តកំពត រងរបួសធ្ងន់ ។ អ្នករួមដំណើរ៥នាក់៖ ១-ឈ្មោះ រក្សា ភេទស្រី អាយុ១៦ឆ្នាំ ។ ២-ឈ្មោះ ឈីម រស្មី ភេទប្រុស អាយុ១៤ ឆ្នាំ ។ ៣-ឈ្មោះ យឿន ចាន់ភាររម្យ ភេទប្រុស អាយុ១៣ឆ្នាំ ។ ៤-ឈ្មោះ សេម វិច្ឆិកា ភេទប្រុស អាយុ១៤ឆ្នាំ ។ ៥-ឈ្មោះ សាន់ គីមឡុង ភេទប្រុស អាយុ១៣ឆ្នាំ ។ ទាំង៥នាក់ រស់នៅភូមិទ្វារថ្មី ឃុំព្រៃថ្នង ស្រុកទឹកឈូ ខេត្តកំពត ។ អ្នកទាំង៥នាក់រងរបួសធ្ងន់ បញ្ជូនទៅកាន់មន្ទីរពេទ្យបង្អែកខេត្តកំពត ។ ម៉ូតូរ៉ឺម៉កខូចខាតកម្រិតធ្ងន់ ។

វត្ថុតាងទាំងពីរគ្រឿង សមត្ថកិច្ចយកទៅរក្សាទុកនៅប៉ុស្តិ៍ព្រៃថ្នង ដើម្បីរង់ចាំធ្វើការដោះស្រាយទៅតាមនីតិវិធីផ្លូវច្បាប់ ៕