បាត់ដំបងៈ យោងតាមផេក ស្នងការដ្ឋាននគរបាលខេត្តបាត់ដំបង បានឲ្យដឹងថា កាលពីថ្ងៃ សុក្រ ៤រោច ខែអស្សុជ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី១៤ ខែតុលា ឆ្នាំ២០២២ អនុវត្តតាមយោបល់ដឹកនាំរបស់លោកឧត្តមសេនីយ៍ទោ សាត គឹមសាន ស្នងការនៃស្នងការដ្ឋាននគរបាលខេត្តបាត់ដំបង រួមនឹងយោបល់លោកវរសេនីយ៍ឯក លឹម ពុទ្ធីឡា ស្នងការរងផែនការងារនគរបាលព្រហ្មទ័ណ្ឌ លោកវរសេនីយ៍ឯក ពេជ្រ សារ៉ែន អធិការនគរបាលក្រុងបាត់ដំបង បានដឹកនាំកម្លាំងជំនាញធ្វើការឃាត់ខ្លួនជនសង័្សយចំនួន០២នាក់ មកកាន់អធិការដ្ឋាន ដើម្បីធ្វើការសាកសួរក្នុងករណី (ឆក់យកទូរស័ព្ទ) របស់ប្រជាពលរដ្ឋនោះគឺ៖
១-ឈ្មោះ ហុង សង្ហា ហៅ ម៉ាប់ ភេទប្រុស អាយុ ២២ឆ្នាំ មានទីលំនៅភូមិព្រែកតាច្រែង ឃុំព្រែកនរិន្ទ ស្រុកឯកភ្នំ ខេត្តបាត់ដំបង ។
២-ឈ្មោះ លឿន ចន្ធី ហៅ ធី ភេទប្រុស អាយុ ២៥ឆ្នាំ មានទីលំនៅភូមិនរា ឃុំនរា ស្រុកសង្កែ ខេត្តបាត់ដំបង ។
សម្ភារៈដកហូតបាន៖ -ម៉ូតូម៉ាកហុងដាឌ្រីមស៊េរីឆ្នាំ២០០៤ ពណ៌ខ្មៅ ពាក់ផ្លាកលេខបាត់ដំបង 1J-2321 មានលេខតួនិងលេខម៉ាស៊ីន 9238811ចំនួន០១គ្រឿង (ជាមធ្យោបាយជិះធ្វើសកម្មភាព) ។ -មួកសុវត្ថិភាព ពណ៌ខ្មៅ ចំនួន០១ ។ -ទូរស័ព្ទដៃម៉ាកណូគាអិនចុចពិលពណ៌ ទឹកសមុទ្រចំនួន០១គ្រឿង ។ -ទូរស័ព្ទដៃម៉ាកខេមហ្វូនពណ៌ខ្មៅ ចំនួន ០១គ្រឿង ។
-កូនសោម៉ូតូចំនួន០១ ។ -ទូរស័ព្ទដៃម៉ាកអូប៊ូ ពណ៌ទឹកប្រាក់ ស្រោមពណ៌ខ្មៅ ចំនួន០១គ្រឿង (ជារបស់ជនរងគ្រោះ) ។
សូមជម្រាបជូនថា កាលពីថ្ងៃទី១៤ ខែតុលា ឆ្នាំ២០២២វេលាម៉ោង០៦ និង ៣០នាទី នៅចំណុចក្រុមទី០៤ ភូមិអញ្ចាញ សង្កាត់អូរចារ ក្រុងបាត់ដំបង ខេត្តបាត់ដំបង មានករណីលួចដោយមានស្ថានទម្ងន់ទោស (ឆក់ទូរស័ព្ទ) មួយបានកើតឡើង ដែលករណីនេះបង្កដោយជនសង័្សយចំនួន០២នាក់ ជិះម៉ូតូមួយគ្រឿងធ្វើសកម្មភាពឆក់យកទូរស័ព្ទ របស់ជនរងគ្រោះឈ្មោះវណ្ណ ផល្លី ភេទប្រុស អាយុ ៤៨ឆ្នាំ មានទីលំនៅភូមិអូរចារ សង្កាត់អូរចារ ក្រុងបាត់ដំបង ខេត្តបាត់ដំបង ដែលទូរស័ព្ទម៉ាកអូប៊ូពណ៌ទឹកប្រាក់ ស្រោមពណ៌ខ្មៅចំនួន០១គ្រឿង ។
ក្រោយកើតហេតុជនរងគ្រោះ បានផ្តល់ព័ត៌មានមកសមត្ថកិច្ចនគរបាល ហើយឆ្លងតាមរយៈការស្រាវជ្រាវកំណត់មុខសញ្ញាបានសមត្ថកិច្ច បានធ្វើការឃាត់ខ្លួនតែម្តង ។
នៅចំពោះមុខសមត្ថកិច្ចជនសង័្សយ បានឆ្លើយសារភាពថា បានប្រព្រឹត្តសកម្មភាពដូចខាងលើប្រាកដមែន ហើយពេលនេះនគរបាលក្រុងកំពុងរៀបចំកសាងសំណុំរឿង បញ្ជូនមកការិយាល័យជំនាញ អនុវត្តបន្តតាមនីតិវិធីច្បាប់ ៕
មតិយោបល់