បន្ទាយមានជ័យ: យោងតាមផេក អគ្គស្នងការដ្ឋាននគរបាលជាតិ បានឲ្យដឹងថា នៅថ្ងៃទី៨ ខែធ្នូ ឆ្នាំ២០២២ មានករណីគ្រោះថ្នាក់ចរាចរណ៍ រវាងរថយន្ត២គ្រឿង បុកគ្នារងការខូចខាតយ៉ាងធ្ងន់ធ្ងរ បណ្តាលឱ្យមនុស្សចំនួន៤នាក់ រងរបួសស្រាល ស្ថិតនៅចន្លោះបង្គោលគីឡូម៉ែត្រលេខ ៣៨១-៣៨២ ផ្លូវជាតិលេខ៥ ភូមិវាំងមួង ឃុំកូប ស្រុកអូរជ្រៅ ខេត្តបន្ទាយមានជ័យ ។

នគរបាលស្រុកអូរជ្រៅ បានឲ្យដឹងថា៖ មុនដំបូងមានរថយន្តមួយគ្រឿង ម៉ាក HIGHLANDER ពណ៌ស្លែ ពាក់ផ្លាកលេខភ្នំពេញ 2AJ-2893 បើកបរដោយឈ្មោះ រ៉ែន ណារិន ភេទប្រុស អាយុ ៤២ ឆ្នាំ មានលំនៅភូមិប៉ាលិលេយ្យ១ សង្កាត់ប៉ោយប៉ែត ក្រុងប៉ោយប៉ែត ខេត្ដបន្ទាយមានជ័យ មានអ្នករួមដំណើរ០២នាក់ (ស្រី) បានបើកបរក្នុងទិសដៅពីទិសខាងលិចទៅទិសខាងកើត លុះមកដល់ចំណុចកើតហេតុ ស្របពេលនោះក៏មានរថយន្ត០១គ្រឿងទៀត ម៉ាក FORD ពណ៌ស ពាក់ផ្លាកលេខ បន្ទាយមានជ័យ 2E-2990 បើកបរដោយឈ្មោះ អៀត សំអូន ភេទប្រុស អាយុ ២០ ឆ្នាំ មានលំនៅភូមិគីឡូម៉ែត្រលេខ៤ សង្កាត់ផ្សារកណ្តាល ក្រុងប៉ោយប៉ែត ខេត្ដបន្ទាយមានជ័យ បើកបរក្នុងទិសដៅពីកើតទៅលិច ច្រាសទិសគ្នា បានមកបុកចំពីមុខរថយន្តម៉ាក HIGHLANDER បណ្តាលឱ្យមានគ្រោះថ្នាក់កើតឡើងតែម្តង ។

នគរបាលបានបញ្ជាក់ថា៖ មូលហេតុ បង្កឱ្យមានគ្រោះថ្នាក់គឺមកពីអ្នកបើកបររថយន្តម៉ាក FORD ពណ៌ស ពាក់ផ្លាកលេខ បន្ទាយមានជ័យ 2E-2990 បើកបរក្នុងល្បឿនលឿនខ្វះការប្រុងប្រយ័ត្ន ហើយបានរេចង្កូតចូលទៅបុករថយន្តម៉ាក HIGHLANDER ដែលបើកបរខាងស្តាំដៃរបស់គេ ។

ករណីនេះ រថយន្តខូចធ្ងន់ទាំង០២គ្រឿង និងមនុស្សចំនួន ៤នាក់ រងរបួសស្រាល នគរបាលបានយករថយន្ត០២គ្រឿង មករក្សាទុកនៅអធិការដ្ឋាននគរបាលស្រុកអូរជ្រៅ ក្រោយពីធ្វើការវាស់វែងរួច ដើម្បីរង់ចាំធ្វើការដោះស្រាយតាមច្បាប់ ៕