-

ជនសង្ស័យ០២នាក់ ត្រូវកម្លាំងសមត្ថកិច្ចឃាត់ខ្លួន ករណីទាស់ពាក្យសម្តីគ្នា ប្រើកាំបិតកាប់ជនរងគ្រោះម្នាក់បណ្តាលឲ្យរបួសធ្ងន់

បាត់ដំបង: យោងតាមផេក ការិយាល័យផ្សព្វផ្សាយតាមបណ្តាញសង្គម បានឲ្យដឹងថា នៅថ្ងៃច័ន្ទ ៤រោច ខែមិគសិរ ឆ្នាំខាល ចត្វាស័ក ព.ស. ២៥៦៦ នៅចំណុចទួលជំនាគ ភូមិគោករកា ឃុំដូនបា ស្រុកគាស់ក្រឡ ខេត្តបាត់ដំបង មានករណីហិង្សាដោយចេតនា មានស្ថានទម្ងន់ទោស (ប្រដាប់ដោយកាំបិត) ចំនួន០១ករណី ទៅលើជនរងគ្រោះម្នាក់ ។

ក្រោយពីទទួលបណ្ដឹងពីជនរងគ្រោះ អនុវត្តតាមការណែនាំបញ្ជាផ្ទាល់ពី លោកឧត្តមសេនីយ៍ទោ សាត គឹមសាន ស្នងការនៃស្នងការដ្ឋាននគរបាលខេត្តបាត់ដំបង ក៏ដូចជាលោកវរសេនីយ៍ឯក លឹម ពុទ្ធីឡា ស្នងការរងផែនការងារនគរបាលព្រហ្មទណ្ឌ លោកវរសេនីយ៍ឯក ប៉ាង ហៀង អធិការនគរបាលស្រុកគាស់ក្រឡ បានដឹកនាំកម្លាំងជំនាញ នៃអធិការដ្ឋាននគរបាលស្រុកគាស់ក្រឡ សហការជាមួយកម្លាំងនគរបាលប៉ុស្តិ៍រដ្ឋបាល បានធ្វើការស្រាវជ្រាវឃាត់ខ្លួនជនសង្ស័យចំនួន០២នាក់៖

១.ឈ្មោះ សម្បត្តិ​ សំបូរ​ ភេទប្រុស​ អាយុ ១៨ ឆ្នាំ​ រស់នៅភូមិគោករកា ឃុំដូនបា ស្រុកគាស់ក្រឡ ខេត្តបាត់ដំបង
២. ឈ្មោះ សំ​ រស្មី​ ភេទប្រុស​ អាយុ ២៨ ឆ្នាំ​ រស់នៅភូមិចែង ឃុំចែងមានជ័យ​ ស្រុកបាណន់ ខេត្តបាត់ដំបង (ជនដៃដល់) ។
នៅចំពោះមុខសមត្ថកិច្ចជនសង័្សយបានឆ្លើយសារភាពថា ខ្លួនពិតជាបានធ្វើសកម្មភាព ប្រើប្រាស់កាំបិតកាប់ទៅលើជនរងគ្រោះម្នាក់ឈ្មោះ​ ពៅ​ យ៉ូន​ ភេទប្រុស​ អាយុ ៤១ឆ្នាំ​ រស់នៅភូមិគោករកា ឃុំដូនបា ស្រុកគាស់ក្រឡ ខេត្តបាត់ដំបង របួស ០៤ថ្នេរ ចំត្រង់ក្បាល ​។

សមត្ថកិច្ចបានបញ្ជាក់ឲ្យដឹងថា​ ករណីហិង្សាខាងលើនេះ គឺបណ្តាលមកពីមានជម្លោះទាស់សំដីគ្នា ដោយប្រើឧបករណ៍នេសាទខុសច្បាប់ ។ នាពេលនេះ​ ជនសង្ស័យទាំង០២នាក់ ត្រូវបានសមត្ថកិច្ចឃាត់ខ្លួន នៅអធិការដ្ឋាននគរបាលស្រុកគាស់ក្រឡ និងកំពុងកសាងសំណុំរឿង បញ្ជូនទៅការិយាល័យជំនាញខេត្ត ដើម្បីចាត់ការបន្តតាមផ្លូវច្បាប់ ៕

មតិយោបល់