រាជធានីភ្នំពេញ ចូលរួមអបអរសាទរការប្រណាំងកង់ពានរង្វាន់ សម្តេចតេជោ

ពិធីប្រណាំងកង់ដៃត្រង់ ដើម្បីដណ្តើមពានរង្វាន់ សម្តេចតេជោនាយក រដ្ឋមន្ត្រី បានរៀបចំប្រព្រឹត្តទៅនៅបរិវេណមុខរមណីយដ្ឋានវត្តភ្នំនាព្រឹកថ្ងៃទី ០៦ ខែមករា ឆ្នាំ ២០១២ ក្រោមអធិបតីភាព ឯកឧត្តម នុត សា អាន រដ្ឋ លេខាធិការក្រសួងមហាផ្ទៃ និងជាប្រធានសហពន្ធ័ខ្មែរកីឡាទោចក្រយាន និង ឯកឧត្តម កែប ជុតិមា អភិបាលរាជធានីភ្នំពេញនិងលោកជំទាវ ដោយ មានចូលរួម ពីកីឡាករ កីឡាការនី មកពីបណ្តា ស្ថាប័ន អង្គភាព សិស្សានុ សិស្ស និង សហពន្ធ័ខ្មែរកីឡាទោចក្រយាន សរុបប្រមាណជាង ៥០០នាក់។

ថ្លែងទៅកាន់កីឡាករ កីឡាការនី នាឱកាសនោះ ឯកឧត្តមអភិបាលរាជធានីភ្នំពេញ បានបញ្ជាក់ថា សាលារាជធានីភ្នំពេញ សហការជាមួយសហពន្ធ័ខ្មែរកីឡាទោចក្រយាន បានរៀបចំឲ្យមានកម្មវិធីប្រកួតកីឡាប្រណាំង កង់ដៃត្រង់ដើម្បីដណ្តើមយក ពានរង្វាន់សម្តេចតេជោ ដើម្បីអបអរសាទរខូបលើកទី៣៤នៃទិវាជ័យជំនះ ៧ មករា (១៩៧៩- ២០១៣) ដែលជាថ្ងៃកំណើតទី២របស់យើងទាំងអស់គ្នា ។ ហើយការប្រណាំងកង់នាពេលនេះ គឺបានបំផុស ដល់ប្រជាពលរដ្ឋយើងដែលរស់នៅក្នុងទីក្រុងនាំគ្នាចូលរួមហាត់ប្រាណ និងលេងកីឡាឲ្យបានគ្រប់ៗគ្នាដើម្បីសុខភាព ព្រោះកីឡាគឹជាថ្នាំសំរាប់ព្យាបាលជំងឹគ្រប់ប្រភេទ ។

ម្យ៉ាងទៀត គឹដើម្បីចូលរួម លើកកំពស់បរិស្ថានក្នុងទីក្រុង ពិសេស កាត់បន្ថយផ្សែងពុលដែលចេញពីម៉ាស៊ីនយានយន្តគ្រប់ប្រភេទ ដែលធ្វើឲ្យប៉ះពាល់ដល់សុខភាពសាធារណៈ របស់ប្រជាពលរដ្ឋ ។ ហើយក៏ជាផ្នែកមួយយ៉ាងសំខាន់ក្នុងការទាក់ទាញភ្ញៀវទេសចរណ៏ឲ្យមានចំណាប់អារម្មណ៏ និងបានចូល មកទស្សនារាជធានីភ្នំពេញកាន់តែច្រើនឡើង នៅពេលដែលរាជធានីភ្នំពេញកំពុងតែមានការអភិវឌ្ឍន៏ យ៉ាងលឿននេះ។

ជាមួយគ្នានេះឯកឧត្តមរដ្ឋលេខាធិការក្រសួងមហាផ្ទៃ បានប្រសាសន៍ដែរថា បច្ចុប្បន្ននេះដោយសារការខិតខំ ជួយជ្រោមជ្រែង និងឧបត្ថម្ភគ្រប់បែបយ៉ាងពីសំណាក់អ្នកស្រឡាញ់វិស័យកីឡាប្រភេទនេះ យើងឃើញថា កីឡា ទោចក្រយានបានបង្កើតសមាគមបានចំនួន៤ ក្លឹបកីឡាទោចក្រយានចំនួន១៥ ដែលស្ថិតក្រោមការគ្រប់គ្រង និង ជួយឧបត្ថម្ភពីវិទ្យាល័យ សកលវិទ្យាល័យ គណៈអភិបាលក្រុង-ខេត្ត ក្រុមហ៊ុន អង្គការសង្គមស៊ីវិលជាដើម។ សព្វថ្ងៃនេះ សហពន្ធ័ខ្មែរកីឡាទោចក្រយាន បានក្លាយជាសមាជិកផ្លូវការរបស់សម្ពន្ធ័អាស៊ីកីឡាទោចក្រយាន និងជាសមាជិកនៃសហភាពអន្តរជាតិកីឡាទោចក្រយានផងដែរ។ ហើយព្រឹត្តិការនេះទទួលបានការចាប់អារម្មណ៏ យ៉ាងខ្លាំងពីមហាជន និងមានការចូលរួមជិះកង់ទាំងអស់គ្នាទាំងក្មេង ចាស់ ប្រុស ស្រីដែលជាការ លើកទឹកចិត្តឲ្យ ប្រជាពលរដ្ឋចេះស្រឡាញ់ និងចូលចិត្តកីឡាទាំងអស់គ្នាដើម្បី សុខភាព មិត្តភាព សន្តិភាព និងសេចក្តីថ្លៃ ថ្នូ គ្មានការសេពគ្រឿងញៀនជាដើម។

បន្ទាប់មក ឯកឧត្តមអភិបាល និងលោកជំទាវ បានអញ្ជើញចូលរួមជិះកង់ជាមួយថ្នាក់ដឹកនាំ មន្ត្រីរាជការ ជុំវិញសាលារាជធានីភ្នំពេញ ដើម្បីជានិម្មិត្តរូចក្នុងការបើកក្បួនប្រណាំងកង់ជាផ្លូវការដែលមានចំងាយ ៥ គីឡូម៉ែត្រ ដោយចាប់ផ្តើមចេញដំណើរពីចំណុចស្ពាននាគខាងមុខរមណីយដ្ឋានវត្តភ្នំទៅវិមានឯករាជ្យ រួចត្រឡប់មកកន្លែងដើម វិញ៕