កិច្ចព្រមព្រៀងសម្ព័ន្ធមេត្រីភាពរវាង រាជធានីភ្នំពេញ នៃព្រះរាជាណា ចក្រកម្ពុជា និង រាជធានីបាងកក នៃព្រះរាជាណាចក្រថៃឡង់ដ៍ ត្រូវបាន ឯកឧត្តម កែប ជុតិមា អភិបាលរាជធានីភ្នំពេញ និង ឯកឧត្តម សុខុមផាន់ បារិបាត់ អភិបាលក្រុងបាងកក បានចុះហត្ថលេខារួមគ្នា នា រសៀលថ្ងៃទី ០៤ ខែ មករា ឆ្នាំ ២០១៣ នៅសាលារាជធានីភ្នំពេញ ។ ពិធី ចុះហត្ថលេខាចងសម្ព័ន្ធមេត្រីភាពនេះ គឺបានប្រព្រឹត្តទៅបន្ទាប់ពី សាលារាជ ធានីភ្នំពេញ ទទួលបានគោលការណ៍អនុញ្ញតដ៏ខ្ពង់ខ្ពង់ពី សម្តេចអគ្គមហា សេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា កាលពីថ្ងៃទី ១៩ ខែ មេសា ឆ្នាំ ២០១២ និងបន្ទាប់ពីថ្នាក់ដឹកនាំនៃរាជធានីរបស់ប្រទេសទាំងពីរ បានជួបពិភាក្សា និងឯកភាពគ្នា កាលពីដំណើរទស្សនកិច្ច របស់គណ:ប្រតិភូទីក្រុងបាងកកជាលើកដំបូងនៅរាជធានី ភ្នំពេញ នាអំឡុងខែ ឧសភា ឆ្នាំ ២០១២ កន្លងមកនេះ ។
តាមខ្លឹមសារនៃកិច្ចព្រមព្រៀងនេះ ភាគីទាំងពីរបានឯកភាពគ្នាបង្កើតនូវទំនាក់ទំនងដែលស្ថិតក្រោមច្បាប់ ជា ធរមាននៃប្រទេសរៀងៗខ្លួន ក្នុងគោលបំណងលើកកម្ពស់ និងពង្រីកនូវកិច្ចសហប្រតិបត្តិការ ទ្វេភាគីឲ្យកាន់តែមាន ប្រសិទ្ធភាពរវាងប្រជាជនទាំងពីរ តាមរយ:នៃការផ្លាស់ប្តូរទស្សន:វិស័យ និងព័ត៌មាន ដែលទាក់ទងនឹងសេដ្ឋកិច្ច សង្គមកិច្ច វប្បធម៌ ការអប់រំ បរិស្ថាន ការបណ្តុះបណ្តាលវជ្ជាជីវ: និង បច្ចេកទេសនានា ។ ក៏ដូចជាការជម្រុញ និង លើកទឹកចិត្ត ឲ្យមាននូវសកម្មភាពនានាដែលទាក់ទងនឹង វិទ្យាសាស្ត្រ ការអប់រំ និងការបណ្តុះបណ្តាលធនធាន មនុស្សរវាងទីក្រុងទាំងពីរផងដែរ ។ ពិសេសការជម្រុញ និងបង្កលក្ខណ:ងាយស្រួលដល់បណ្តាអាជីវកររបស់ទីក្រុង ទាំងពីរ បានជួបពិភាក្សាគ្នាផ្លាស់ប្តូរបទពិសោធន៍លើការបណ្តាក់ទុនរកស៊ីទាំងនៅភ្នំពេញ និងនៅបាងកក ដោយ គោរពទៅតាមច្បាប់នីមួយៗ តាមគោលការណ៍ស្មើភាព និងមានផលប្រយោជន៍ទាំងសងខាង ។
សូមបញ្ជាក់ថា : ក្នុងឱកាសដែលគណ:ប្រតិភូទីក្រុងបាងកក ដឹកនាំដោយ ឯកឧត្តម សុខុមផាន់ បារិបាត់ អភិបាលក្រុងបាងកក អញ្ជើញមកបំពេញទស្សនកិច្ចជាផ្លូវការនៅរាជធានីភ្នំពេញ ពីថ្ងៃទី ០៣ ដល់ថ្ងៃទី ០៤ ខែ មករា ឆ្នាំ ២០១៣ កន្លងមកនេះ ក្រៅពីបានអញ្ជើញចូលរួមចុះហត្ថលេខាលើកិច្ចព្រមព្រៀងសម្ព័ន្ធមេត្រីភាពរវាង រាជ ធានីភ្នំពេញ និង រាជធានីបាងកក គណ:ប្រតិភូក៍បានអញ្ជើញចូលគោរព ព្រះវិញ្ញាណក្ខន្ធ ព្រះបរមសព ព្រះមហា វីរក្សត្រ ព្រះវររាជបិតាជាតិខ្មែរ ព្រះបរមរតនកោដ្ឋ ជាទីសក្ការដ៏ខ្ពង់ខ្ពស់ នារសៀលថ្ងៃទី ០៣ ខែ មករា ឆ្នាំ ២០១៣ នៅព្រះបរមរាជវាំង ក្រោមព្រះវត្តមាន សម្តេចរាជបុត្រី ព្រះអនុជ នរោត្តម អរុណរស្មី ព្រះរាជតំណាងដ៏ខ្ពង់ខ្ពស់ នៃ ព្រះករុណាព្រះបាទសម្តេចព្រះ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា និង សម្តេច ព្រះមហាក្សត្រី នរោត្តម មុនីនាថ សីហនុ ព្រះវររាជមាតាជាតិខ្មែរ៕
មតិយោបល់