ខាងក្លិប Paris St Germain គឺនឹងធ្វើការបង្ហាញកីឡាករ David Beckham ក៏ដូចជាការធ្វើកុងត្រាថ្មីរបស់ពួកគេ ដែលការបង្ហាញនេះត្រូវបានធ្វើសន្និសីទកាសែត កាលពីល្ងាចថ្ងៃ ព្រហស្បតិ៍ម្សិលមិញនេះ។
កីឡាករ David Beckham គឺមានក្លិបជាច្រើនដែលចាប់អារម្មណ៍ចង់បាន ខណៈដែល Beckham បានចាកចេញពីក្លិប LA Galaxy កាលពីខែ ធ្នូ កន្លងទៅ ហើយនៅពេលនេះដែរកីឡាកររូបនេះបានពិនិត្យសុខភាព ដែលបំណងចង់ចូលរួមជាមួយនឹងក្លិបខាងលើ។
កីឡាករវ័យ ៣៧ ឆ្នាំរូបនេះ ដែលជាអតីតជម្រើសជាតិអង់គ្លេស បានបង្ហាញខ្លួនជាមួយនឹងអ្នកសារព័ត៌មាន នៅវេលាម៉ោង ៤ ដែលជាម៉ោងនៅក្នុងតំបន់នោះ។
Beckham គឺជាកីឡាករមួយរូបដែលរកចំណូលបានយ៉ាងច្រើន ម្យ៉ាងវិញទៀតត្រូវបានគេអញ្ជើញជាភ្ញៀវក្នុងកម្មវិធីនានា នៅជុំវិញពិភពលោក តាំងពីគាត់បានបញ្ចប់ ការស្នាក់នៅជាមួយនឹងកម្មវិធី Major League Soccer រយៈពេល ៦ ឆ្នាំនោះ។
កីឡាកររូបនេះក៏បានចូលរួមជាមួយនឹងគ្រូបង្វឹក Carlo Ancelot នៅអ៊ីតាលី ខណៈដែលកម្ជីជើងនៅ AC Milan និងចូលរួមលេងនៅ Ligue 1ផងដែរ។
Beckham កាលពីសប្តាហ៍កន្លងទៅថ្មីៗនេះ ក៏បានចូលរួមហ្វឹកហាត់ជាមួយនឹងក្លិបកាំភ្លើងធំ មុននឹងបញ្ចប់ការផ្ទេរនោះទៅកាន់ ក្លិប Paris St Germain។
គួរបញ្ជាក់ផងដែរថា នៅរាត្រីនេះ ក្លិប Paris St Germain និងប៉ះជាមួយនឹង ក្លិប Toulouse នៅវេលាម៉ោង 19:30 នាទីដែលជាម៉ោងស្ថិតនៅក្នុងតំបន់៕
មតិយោបល់