ប្រភពព័ត៌មាន Israel Channel 10 កាលពីថ្ងៃសុក្រ កន្លងទៅនេះ ដែលត្រូវថ្ងៃទី ១២ ខែ កក្កដា បុរសម្នាក់ដែលមិនបានបង្ហាញឈ្មោះ វ័យ ៣៥ ឆ្នាំ ដែលរស់នៅ អ៊ីស្រាអ៊ែល បានរងការវាយប្រហារពីសត្វពស់ ខណៈដែលចូលទៅបន្ទោរបង់ នៅក្នុងបង្គន់ ស្ថិតនៅផ្ទះឪពុកម្តាយរបស់គាត់ នាភាគខាងជើងនៃប្រទេស។
បុរសរូបនោះបាននិយាយថា គាត់បានឃើញពស់តូចមួយក្បាល នៅក្នុងបង្គន់ ប៉ុន្តែរំពេចជាមួយគ្នានោះ វាបានលូនយ៉ាងឆាប់រហ័សដើម្បីរត់គេចខ្លួន។ តែទោះជាយ៉ាងណា ដោយការធ្វេសប្រហែសនោះ ដោយមិននឹកស្មានថា វាលាក់ខ្លួននៅក្នុងចានបង្គន់ ហើយក៏វាយប្រហារមកលើ ពងរបស់គាត់តែម្តង ដែលធ្វើឲ្យឈឺចុកផ្សារ។
ក្រោយការវាយប្រហារពីសត្វពស់មួយក្បាលនោះ ជនរងគ្រោះត្រូវបានគេបញ្ចូនទៅកាន់មន្ទីរពេទ្យ Rambam Hospital ដើម្បីសង្គ្រោះបន្ទាន់។ ខាងគ្រូពេទ្យបាននិយាយថា ជនគ្រោះស្ថិតនៅក្នុងដំណើរទង្គិចយ៉ាងខ្លាំង ដោយស្ថិតក្រោមការព្យាបាលយ៉ាងយកចិត្តទុកដាក់។ ជាសំណាងល្អ តាមការធ្វើតេស្តបានបង្ហាញឲ្យដឹងថា ពស់នេះវាមិនសូវជាសម្បូរពិស និងមិនមានហានិភ័យដល់ជីវិតឡើយ។ ដូច្នេះបន្ទាប់ពី ២ ទៅ ៣ ម៉ោងក្រោយ ជនរងគ្រោះមានសុខភាពប្រក្រតីវិញ។ រឿងនេះដែរក៏ធ្វើឲ្យ បុគ្គលិកក្នុងពេទ្យ មានការភ្ញាក់ផ្អើលយ៉ាងខ្លាំង ព្រោះថាមិនដែលជួបបញ្ហាព្យាបាលដូចលើកនេះ ដែលជាករណីចម្លែក ពស់ចឹកពង។ តែទោះជាយ៉ាងណា អ្នកនាំពាក្យខាងមន្ទីរពេទ្យ បាននិយាយថា នេះជាមេរៀនសម្រាប់បុរសរូបនោះ និងសុភាពបុរសទាំងអស់ កុំបន្ទោរបង់កន្លែងដែលអាចបង្ករហានិភ័យ ៕
មតិយោបល់