ស្ត្រីជនជាតិចិនម្នាក់បានរងរបួសភ្នែក ដោយសារតែ iPhone 5 របស់នាងផ្ទុះឡើង ខណៈពេលដែលកំពុងនិយាយទូរស័ព្ទ ប៉ុន្តែមិនមានប៉ះពាល់ខ្លាំងក្លានោះទេ។
យោងតាមសារព័ត៌មានចិនមួយឈ្មោះថា Dlxww បានឲ្យដឹងថា ស្ត្រីម្នាក់ឈ្មោះ Lee បានរងគ្រោះថ្នាក់ត្រង់ភ្នែក ដោយសារតែ iPhone 5 របស់គាត់ផ្ទុះឡើង។ ស្ត្រីរងគ្រោះបានរាប់រៀបថា នៅព្រឹកថ្ងៃកើតហេតុនាង បានចុះពីលើផ្ទះមកជាន់ក្រោម រួចអង្គុយក្នុងរថយន្ត។ ក្រោយពីសន្ទនាតាមរយៈទូរស័ព្ទជាមួយនឹងមិត្តភ័ក្តអស់រយៈពេលជាង ៤០នាទី នាងក៏មានអារម្មណ៍ថា iPhone នាងចាប់ផ្ដើមក្ដៅ ពេលនោះ នាងចង់បញ្ចប់ការសន្ទនា ប៉ុន្តែពេលចុចលើប៊ូតុង Call end បែបជាមិនដំណើរការ ព្រោះថាអេក្រង់ទូរស័ព្ទមានបញ្ហា ហើយ iPhone 5 ក៏ផ្ទុះឡើង ដែលធ្វើឲ្យបំណែកនៃ iPhone ខ្ទាតទៅប៉ះនឹងភ្នែករបស់នាង។
ក្រោយពីកើតហេតុនាងក៏ត្រូវបានមិត្តភ័ក្តិបញ្ជូនទៅកាន់មន្ទីរពេទ្យ ដើម្បីពិនិត្យព្យាបាល ហើយគ្រូពេទ្យបាននិយាយថា ភ្នែករបស់នាងបានរងរបួស ប៉ុន្តែមិនសូវធ្ងន់ធ្ងរនោះទេ ដោយអាចនឹងជាឡើងវិញឆាប់ៗនេះ។
https://i1272.photobucket.com/albums/y389/domneng/Decore/Decore015/B051375983455042_change_B05809CAb001_zps248a69f9.jpg
នារីរងគ្រោះបានទិញ iPhone 5 កាលពីខែកញ្ញាឆ្នាំមុន ហើយនាងបាននិយាយថា iPhone 5 នោះគឺធ្លាប់ធ្លាក់តែម្ដងគត់ ប៉ុន្តែវានៅអាចប្រើប្រាស់បាន ហើយក្រោយពេលកើតហេតុការណ៍ តំណាងចែកចាយបាននិយាយថា ទូរស័ព្ទ iPhone នោះបានផុតកាលបរិច្ឆេទនៃការធានា ដូច្នេះមិនមានសំណងនោះទេ ប៉ុន្តែនាង Lee ក៏បានឲ្យដឹងផងដែរថា គាត់មិនត្រូវការសំណងឡើងគឺគ្រាន់តែចង់ប្រាប់ដល់អ្នកប្រើ iPhone គ្រប់គ្នាឲ្យបានដឹង និងប្រុងប្រយ័ត្ន។
គួរបញ្ជាក់ផងដែរថា កាលពីខែមុនមានស្ត្រីវ័យ ២៣ឆ្នាំជាអ្នកបម្រើការអាកាសចរណ៍ បានស្លាប់ ដោយសារតែនាងទទួលទូរស័ព្ទ iPhone ពេលកំពុងសាក់ថ្ម ហើយក្រោយមកក៏បាន បុរសម្នាក់ទៀតដួលសន្លប់ដោយសារ iPhone 4S សាកថ្មផងដែរ ដោយតាមការស្រាវជ្រាវបានរកឃើញថា អ្នកទាំងពីរខាងលើបានប្រើឧបករណ៍សាកថ្មក្លែងក្លាយ មិនមែនជារបស់ក្រុមហ៊ុន។
ចំណាំ៖ សូមបងប្អូនដែលប្រើប្រាស់នូវ iPhone ទាំងឡាយ គួប្បីប្រើប្រាស់នូវឧបករណ៍សាកថ្ម និងឧបករណ៍មួយចំនួនទៀតដូចជាកាស ថ្ម ដែលជារបស់ក្រុមហ៊ុន ចៀសវាងឧបទ្ទហេតុដូចខាងលើកើតឡើង។ លុយកាក់បន្តិចបន្តួចយើងអាចរកមកវិញបាន ប៉ុន្តែអាយុជីវិតមិនអាចទិញដូរតាមទីផ្សារបាននោះទេ…៕
មតិយោបល់