កាលពីថ្ងៃអង្គារកន្លងទៅនេះ រដ្ឋាភិបាលចិនបានឲ្យដឹងថា ការវិនិយោគផ្ទាល់ពីបរទេស (FDI) ក្នុងប្រទេស នារយៈពេល ៨ខែដំបូង ឆ្នាំ២០១៣ បានកើនឡើង ៦,៣៧ ភាគរយធៀបនឹងរយៈពេលដូចគ្នាកាលពីឆ្នាំ២០១២។
យោងតាមទីភ្នាក់ងារព័ត៌មាន ស៊ិនហួ បានចុះផ្សាយថា រដ្ឋាភិបាលបានលើកឡើងថា នេះជាសញ្ញាមួយនៃទំនុកចិត្តរបស់វិនិយោគិននៅក្នុងប្រទេសមានសេដ្ឋកិច្ចធំជាងគេទី២របស់ពិភពលោកមួយនេះ។
ក្រសួងពាណិជ្ជកម្មនិយាយនៅក្នុងសេចក្ដីប្រកាសព័ត៌មានមួយថា FDI ដែលកំពុងចូលមកដោយមិនរាប់បញ្ចូលវិស័យហិរញ្ញវត្ថុបានកើនឡើង ៧៩,៧៧ពាន់លានដុល្លារអាមេរិកក្នុងចន្លោះខែ មករា-សីហា។
នៅក្នុងខែសីហា តួលេខមាន ៨,៣៨ ពាន់លានដុល្លារកើនឡើង ០,៦២ ភាគរយបើធៀបនឹងឆ្នាំទៅ។
បញ្ហានោះបានបង្ហាញពីការធ្លាក់ចុះបន្ទាប់ពីការកើនឡើង ២៤,១៣ ភាគរយកាលពីខែ កក្កដា និង ២០,១២ ភាគរយកាលពីខែមិថុនា។
ប៉ុន្តែលោក Shen Danyang អ្នកនាំពាក្យក្រសួងពាណិជ្ជកម្មបានថ្លែងថា បញ្ហាសំខាន់ដោយសារតែតួលេខមូលដ្ឋានកើនឡើងខ្ពស់កាលពីឆ្នាំទៅ។ លោកថ្លែងថា “ការប្រែប្រួលតែក្នុងមួយខែដូចនោះ គឺមិនគ្រប់គ្រាន់ក្នុងការឆ្លុះបញ្ចាំងពីការផ្លាស់ប្តូរ ក្នុងការវិនិយោគផ្ទាល់ពីបរទេសជារួមរបស់ចិនទេ។ មិនមានការបារម្ភអំពីការផ្លាស់ប្តូរនៅក្នុងនិន្នាការនេះទេ”។ លោកបន្តថា ការវិនិយោគរក្សាបាន “កំណើនលឿនបំផុត” នៅក្នុងរយៈពេល ៨ ខែ។ លោកបានប្រាប់ដល់អ្នកកាសែតថា “កំណើន FDI ត្រូវបានគេរំពឹងថានឹងកើនឡើងខ្ពស់ជាងឆ្នាំមុន”។ លោកលើកឡើងថា សន្ទុះដែលមានភាពប្រសើរឡើងចាប់តាំងពីខែ កុម្ភៈ បានបង្ហាញពី ទំនុកចិត្តរបស់វិនិយោគិនក្នុងសមត្ថភាពប្រកួតប្រជែងរបស់ប្រទេសចិន៕
មតិយោបល់