នៅក្នុងរយៈពេល ៨ខែដំបូងនៃឆ្នាំ ២០១៣ កម្ពុជាកើតមានជំងឺគ្រុនចាញ់ ២៥.០៥០ករណី ពោលគឺធ្លាក់ចុះ ៤៩ភាគរយ បើធៀបនឹងរយៈពេលដូចគ្នាកាលពីឆ្នាំ ២០១២ មានចំនួន ៤៨.៨១០ករណី។ តួលេខនេះត្រូវបានផ្ដល់ដោយមជ្ឈមណ្ឌលជាតិជំងឺគ្រុនចាញ់ បានឲ្យដឹងកាលពីថ្ងៃព្រហស្បតិ៍។
ទីភ្នាក់ងារព័ត៌មាន ស៊ិនហួ បានចុះផ្សាយនៅថ្ងៃទី១៩ខែកញ្ញា កន្លងទៅនេះថា នៅក្នុងចន្លោះខែមករា-សីហា ឆ្នាំនេះ ជំងឺគ្រុនចាញ់បានសន្លាប់មនុស្សចំនួន ៦នាក់ ដែលកាលពីឆ្នាំមុនមានរហូតដល់ទៅ ៣១នាក់។
លោកវេជ្ជបណ្ឌិត ច ម៉េង ចួ ប្រធានមជ្ឈមណ្ឌលជាតិជំងឺគ្រុនចាញ់ បានប្រាប់ទីភ្នាក់ងារ ស៊ិនហួថា “ចំនួនអ្នកស្លាប់ដោយសារជំងឺគ្រុនចាញ់ លែងជាកង្វល់ដ៏ធំទៀតហើយសម្រាប់ប្រជាជនកម្ពុជា”។
កាលពីឆ្នាំ ២០១២ មុងជាង ១លានត្រូវបានចែកជួនដោយឥតគិតថ្លៃដល់ប្រជាពលរដ្ឋនៅក្នុងទូទាំងប្រទេសកម្ពុជា ដើម្បីទប់ស្កាត់ជំងឺគ្រុនចាញ់។
រដ្ឋាភិបាលបានប្ដេជ្ញាចិត្តនឹងបញ្ឈប់ឲ្យមានអ្នកស្លាប់ដោយសារជំងឺគ្រុនចាញ់នៅក្នុងឆ្នាំ ២០១៥ នឹងលុបបំបាត់ទាំងស្រុងនៅក្នុងឆ្នាំ ២០២៥។ នេះជាការបញ្ជាក់របស់លោក វេជ្ជបណ្ឌិត ច ម៉េង ចួ។
ជំងឺគ្រុនចាញ់ភាគច្រើនកើតមានជាញឹកញាប់នៅក្នុងរដូវវស្សា និងភាគច្រើនកើនមានឡើងនៅក្នុងតំបន់ព្រៃ និងខេត្តដែលមានព្រៃភ្នំ។
តាមរយៈរបាយការណ៍បានបញ្ជាក់ថា កាលពីឆ្នាំមុន កម្ពុជាបានកើតមានជំងឺគ្រុនចាញ់ចំនួន ៤៨,៥៥៥៣ករណី និងមានមនុស្សស្លាប់ចំនួន ៤៥នាក់៕
មតិយោបល់