ក្រុមហ៊ុនផលិតរថយន្ត Chrysler Group LLC បានសម្ដែងនូវសេចក្ដីសប្បាយរីករាយកាលពីថ្ងៃសុក្រម្សិលមិញនេះថា ការលក់រថយន្តនៅក្នុងខែធ្នូ បានកើនឡើង ៦ភាគរយ សម្រាប់ទីផ្សារសហរដ្ឋអាមេរិក ដែលនេះជាភាពជោគជ័យមួយមិនធ្លាប់ជួបប្រទះចាប់តាំងពីឆ្នាំ ២០០៧មក។
នៅក្នុងរបាយការណ៍បានបញ្ជាក់ថា ការលក់រថយន្ត Jeep បានកើនឡើង ៣៤ភាគរយ នៅក្នុងខែធ្នូ ហើយម៉ូដែល Cherokee លក់ដាច់ជាង Jeep Liberty រហូតដល់ទៅ ៤ដង បើធៀបទៅនឹងរយៈពេលដូចគ្នាកាលពីឆ្នាំមុន។
បើទោះជាការលក់រថយន្តនៅក្នុងខែធ្នូ សម្រាប់ទីផ្សារសហរដ្ឋអាមេរិកកើនឡើងក្ដី ប៉ុន្តែតួលេខនេះនៅតិចជាងការរំពឹងទុករបស់ក្រុមអ្នកវិភាគចំនួន ៥នាក់ ដោយបានព្យាករថានឹងកើនឡើងដល់ ៧ភាគរយ។
យោងតាមរបាយការណ៍នេះ បានបង្ហាញថា Chrysler ជាក្រុមហ៊ុនផលិតរថយន្តដំបូងគេដែលតួលេខនៃការលក់រថយន្តនៅសហរដ្ឋអាមេរិកកើនឡើងខ្ពស់ក្នុងខែធ្នូ៕
មតិយោបល់