ភ្នំពេញ ៖ ជនសង្ស័យ២នាក់ត្រូវបានសមត្ថកិច្ចប៉ុស្ដិ៍នគរបាលរដ្ឋបាលសង្កាត់ផ្សារដើមថ្កូវឃាត់ខ្លួននៅក្នុងបន្ទប់ផ្ទះសំណាក់យីហោ ហាក់ឆាយហេង បន្ទាប់ពីជនសង្ស័យទាំង២នាក់នោះបានប្រើប្រាស់គ្រឿងញៀននៅក្នុងបន្ទប់ផ្ទះសំណាក់ តាមបណ្ដោយផ្លូវលេខ២៧១ ក្រុម១ ភូមិ១ សង្កាត់ផ្សារដើមថ្កូវ ខណ្ឌចំការមន កាលពីវេលាម៉ោង១១និង៣០នាទីយប់ថ្ងៃទី២៤ខែមិនាឆ្នាំ២០១៤។
សមត្ថកិច្ចបានឱ្យដឹងថា ជនសង្ស័យទី១ឈ្មោះ តឹប អៀប ភេទប្រុសអាយុ៣០ឆ្នាំជនជាតិខ្មែរ មានទីលំនៅផ្ទះលេខ១១៩ ផ្លូវ៣៦៩ សង្កាត់ច្បារអំពៅ២ ខណ្ឌមានជ័យ ទី២ឈ្មោះ ឆាយ ឃាង ហៅឆាយវិសិទ្ធ ភេទប្រុសអាយុ២៨ឆ្នាំជនជាតិខ្មែរ មានទីលំនៅនិងមុខរបរមិនពិតប្រាកដ។
សមត្ថកិច្ចបានអោយដឹងបន្តទៀតថា នៅវេលាម៉ោងកើតហេតុប៉ុស្ដិ៍នគរបាលផ្សារដើមថ្កូវ បានទទួលព័ត៌មានតាមទូរស័ព្ទពីម្ចាស់ផ្ទះសំណាក់បានរាយការណ៍ថា ក្នុងបន្ទប់ផ្ទះសំណាក់លេខ៣០៣ មានជនសង្ស័យចំនួន២នាក់កំពុងប្រើប្រាស់គ្រឿងញៀនក្នុងបន្ទប់ ក្រោយពីទទួលព័ត៌មានបានកម្លាំងនគរបាលប៉ុស្ដិ៍ផ្សារដើមថ្កូវសហការជាមួយម្ចាស់ផ្ទះសំណាក់ បានចុះត្រួតពិនិត្យបន្ទប់ខាងលើនិងរកឃើញវត្ថុតាងមួយចំនួនរួមមាន ថ្នាំញៀនប្រភេទក្រាមថ្លាចំនួន២កញ្ចប់ធំនិង៨កញ្ចប់តូច កូនថង់ប្លាស្ទិចសំរាប់ច្រកថ្នាំញៀនមួយចំនួន ទុយោសំរាប់ប្រើប្រាស់ចំនួន១ ឧបករណ៍សំរាប់ជក់គ្រឿងញៀន១កំផ្លេ ដែកកេះចំនួន១ ទូរស័ព្ទចិន១គ្រឿង អត្តសញ្ញាណប័ណ្ណសញ្ជាតិខ្មែរ១សន្លឹក លុយដុល្លារ៤០ដុល្លារ លុយខ្មែរចំនួន៥០០រៀល ម៉ូតូវីវ៉ាមួយគ្រឿង ពណ៌ខ្មៅ មានស្លាកលេខ កណ្ដាល 1E-5106 ។សមត្ថកិច្ចបញ្ជាក់ថាជនសង្ស័យទាំង២នាក់ខាងនេះទើបតែចេញពីពន្ធនាគារមិនទាន់បាន១ខែនោះទេ។
ក្រោយពេលធ្វើការត្រួតពិនិត្យរកឃើញវត្ថុតាងខាងលើសមត្ថកិច្ចចំរុះបានធ្វើការដកហូតនិងឃាត់ខ្លួនជនសង្ស័យទាំង២នាក់យកមកប៉ុស្ដិ៍នគរបាលរដ្ឋបាលផ្សារដើមថ្កូវដើម្បីសាកសួរនិងបញ្ជូនទៅអធិការដ្ឋាននគរបាលខណ្ឌចំការមនកសាងសំណុំរឿងបញ្ជូនទៅតុលាការផ្ដន្ទាទោសតាមផ្លូវច្បាប់៕
មតិយោបល់