អាល្លឺម៉ង់៖កីឡាករ Toni Kroos របស់ Bayern Munich ត្រូវបានអ្នកគ្រប់គ្រង និងជា​អ្នកចាត់ការទូទៅលោក Pep Guardiola និង មេធំ Karl-Heinz Rummenigge បាន​អះអាងថា អនាគតរបស់គាត់គឺនៅបន្តលេង​ឲ្យក្លិប ដោយគ្មានការផ្លាស់ប្តូរទៅណានោះទេ​។​
ខ្សែបម្រើវ័យ ២៤ ឆ្នាំ នឹង​ផុតកុងត្រា​ជាមួយនឹងក្លិប នៅរដូវកាលបន្ទាប់នេះ ហើយក៏កំពុងមានទំនាក់ទំនង​​ផ្លាស់ទៅកាន់ បិសាចក្រហមផងដែរ​។​

ក៏ប៉ុន្តែ Kroos នឹង​ក្លាយទៅជា ​សមាជិកដ៏សំខាន់ ​​លេង​ជាមួយនឹង Bayern Munich នារាត្រីនេះ ខណៈក្លិបខ្លួន ត្រូវ​ធ្វើដំណើរទៅកាន់ទឹកដីអង់គ្លេស ដើម្បីប្រកួត ​ជាមួយនឹងបិសាចក្រហម ក្នុងក្របខណ្ឌ Champions League នាវគ្គ ៨ ក្រុមចុងក្រោយ​។​
មេធំរបស់ក្លិប Bayern Munich លោក Rummenigge បាន​ប្រាប់ដល់សារព័ត៌មាន មុននឹងហោះហើរទៅកាន់ទឹកដីអង់គ្លេស កាលពីថ្ងៃចន្ទ ថា Toni Kroos ជាក់ណាស់នៅតែពាក់អាវ Bayern Munich ។ លោក Pep Guardiola បានបន្ទរពាក្យថា កីឡាករសញ្ជាតិ​អាល្លឺម៉ង់រូបនេះ នឹង​បន្ត និងពន្យាពេល​ឲ្យស្នាក់នៅ នា​រដូវកាលក្រោយ​។​

Pep Guardiola បានបន្តទៀតថា “ខ្ញុំសង្ឈឹមថា ​គាត់នឹងពង្រីកកុងត្រា​​ជាមួយនឹងក្លិប ព្រោះថា​គាត់ជា​អ្នកលេង​ដ៏ល្អមួយរូប ហើយស្រលាញ់ការប្រកួត​ខ្លាំងណាស់ និងក៏ចង់ឲ្យគាត់លេងបន្តជាមួយនឹងក្លិបផងដែរ” ៕​