ភ្នំពេញ ៖ រថយន្ត២គ្រឿងបុកគ្នាពេញទំហឹងនៅចំណុចផ្លូវបែកជាបួនបណ្ដាលអោយរងការខូចខាតទាំងសងខាងយ៉ាងដំណំ កាលពីវេលាម៉ោង២និង១០នាទីរំលងអាធ្រាត្រឈានចូលថ្ងៃទី២ខែមេសាឆ្នាំ២០១៤ ត្រង់ចំណុចផ្លូវលេខ១៩កែងផ្លូវ១០៦ ស្ថិតក្នុងសង្កាត់វត្តភ្នំ ខណ្ឌដូនពេញ។
ប្រភពព័តមានពីកន្លែងកើតហេតុបានឱ្យដឹងថា នៅមុនពេលកើតហេតុមានរថយន្តមួយគ្រឿងម៉ាក តូយ៉ូតា កូរ៉ូឡា ពណ៌សំបកឪឡឹក ពាក់ស្លាកលេខ កំពង់ចាម 2A-1507 បានធ្វើដំណើរតាមបណ្ដោយផ្លូវ១០៦ ទិសដៅពីកើតទៅលិចក្នុងល្បឿនលឿន ខណៈនោះក៏មានរថយន្តមួយគ្រឿងម៉ាក តូយ៉ូតា កាមរី (ឆ្លាម) ពណ៌ស្ករ ពាក់ស្លាកលេខ ភ្នំពេញ 2L-4010 បានធ្វើដំណើរតាមបណ្ដោយផ្លូវលេខ១៩ ទិសដៅពីត្បូងទៅជើងក្នុងល្បឿនលឿនដូចគ្នា ស្រាប់តែមកដល់ចំណុចកើតហេតុជាផ្លូវកែង រថយន្តកាមរី (ឆ្លាម) ក៏បុកចំពីក្បាលរថយន្តកូរ៉ូឡា ពីជំហៀងផ្នែកខាងឆ្វេងចំពេញទំហឹង បណ្ដាលអោយរថយន្តកូរ៉ូឡារងការខូចខាតផ្នែកខាងមុខនិងបែកកង់ខាងមុខ ផ្នែកខាងឆ្វេងទៅមុខលែងរួច ចំណែករថយន្តកាមរីក៏ជ្រុលចង្កូតបុកឡើងខឿនផ្លូវ និងផ្ទុះពោងសុវត្តិភាពទាំង២ រងការខូចខាតផ្នែកខាងមុខយ៉ាងតំណំ សំណាងដែលគ្រោះនេះពុំមានមនុស្សរងរបួសធ្ងន់គ្រាន់តែរបួសបន្តិចបន្តួច។ បន្ទាប់ពីកើតហេតុម្ចាស់រថយន្តទាំង២បានប្រកែកយកត្រូវរៀងៗខ្លួន ហើយសមត្ថកិច្ចដែលឈរជើងប្រចាំគោលដៅក្បែរនោះក៏បានចុះមកអន្តរាគមន៍ភ្លាមៗផងដែរ។ ក្រោយពេលកើតហេតុភាគីទាំង២ដោះស្រាយគ្នាមិនត្រូវ ទើបសមត្ថកិច្ចសំរេចចិត្តទំនាក់ទំនងទៅសមត្ថកិច្ចជំនាញចរាចរដើម្បីធ្វើការវាស់វែងស្ទូចយករថយន្តទាំង២គ្រឿងយកទៅរក្សាទុកនៅការិយាល័យចរាចរជើងគោកនៃស្នងការរាជធានីភ្នំពេញដើម្បីរង់ចាំធ្វើការដោះស្រាយតាមផ្លូវច្បាប់៕
មតិយោបល់