ភ្នំពេញ ៖ រថយន្តសង្គ្រោះបន្ទាន់មន្ទីរពេទ្យបង្អែក ខេត្តព្រះសីហនុ បើកក្នុងល្បឿនបានបុកចំម៉ូតូធុនធំម៉ាក ផូសា ត្រង់ចំណុចផ្លូវបែកជាបួន បណ្ដាលអោយយុវជនម្នាក់របួសធ្ងន់ ដែលហេតុការណ៍នេះបានកើតឡើងកាលពីវេលាម៉ោង២និង៤០នាទីរំលងអាធ្រាត្រឈានចូលថ្ងៃទី០២ខែមេសាឆ្នាំ២០១៤ នៅចំណុចផ្លូវលេខ៩០កែងផ្លូវលេខ៦១ ស្ថិតនៅក្នុងសង្កាត់វត្តភ្នំ ខណ្ឌដូនពេញ។
ប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុមានរថយន្តសង្គ្រោះបន្ទាន់មួយគ្រឿងរបស់មន្ទីពេទ្យបង្អែក ខេត្តព្រះសីហនុ ម៉ាកមីស៊ុយប៊ីស៊ី ប៉ាសេរ៉ូ ពណ៌ស ពាក់ស្លាកលេខ រដ្ឋ12 2-0461 បើកដឹកអ្នកជំងឺក្នុងល្បឿនយ៉ាងលឿន តាមបណ្តោយផ្លូវលេខ៩០ក្នុងទិសដៅពីលិចទៅកើត ខណៈនោះក៏មានម៉ូតូធុនធំមួយគ្រឿង ម៉ាក ផូសា ពណ៌ក្រហម អត់ស្លាកលេខ ជិះធ្វើដំណើរដោយបុរសម្នាក់ក្នុងល្បឿនយ៉ាងលឿន តាមផ្លូវលេខ៦១ ស្រាប់តែមកដល់ចំណុចកើតហេតុជាផ្លូវកែង រថយន្តបានបុកម៉ូតូពេញទំហឹង ផ្លោងទាំងម៉ូតូនិងមនុស្សបោកទៅនិងថ្នល់ បណ្តាលឱ្យយុវជនជិះម៉ូតូរបួសធ្ងន់ ចំណែករថយន្តខូចខាតផ្នែកខាងមុខយ៉ាងតំណំ។ បន្ទាប់ពីកើតហេតុជនរងគ្រោះត្រូវបានរថយន្តសាមុយដឹកយកទៅសង្គ្រោះនៅមន្ទីរពេទ្យកាល់ម៉ែតភ្លាមៗ។
ក្រោយពេលកើតហេតុ រថយន្តនិងម៉ូតូត្រូវបានសមត្ថកិច្ចធ្វើការវាស់វែងយកទៅកាន់ការិយាល័យចរាចរណ៍ជើងគោកនៃស្នងការដ្ឋាននគរបាលរាជធានី ដើម្បីរង់ចាំធ្វើការដោះស្រាយតាមផ្លូវច្បាប់៕
មតិយោបល់