ភ្នំពេញ៖រថយន្តកុងតឺន័រមួយគ្រឿងបើកបរដោយបុរសម្នាក់ងងុយដេកក៏រ៉េចង្កូតបុកចំរថយន្តកុងតឺន័រមួយគ្រឿងទៀតចំពីជំហៀងដោយសារម្ចាស់រថយន្តកុងតឺន័រគេចក្បាលរថយន្តទាន់ពេល បណ្ដាលអោយបុរសជាតៃកុងរថយន្តងងុយដេកនោះបុកគាបជាប់រងរបួសបាក់ជើងម្ខាង ដែលហេតុការណ៍នេះបានកើតឡើងកាលពីវេលាម៉ោង១និង១០នាទីរំលងអាធ្រាត្រឈានចូលថ្ងៃទី២ខែមេសាឆ្នាំ២០១៤ ត្រង់ចំណុចមុខស្ថានីយ៍ប្រេងឥន្ទនៈសូគីមិច តាមបណ្ដោយផ្លូវវែងស្រេងកែងផ្លូវឧញ៉ា ឌួង ងៀប ស្ថិតក្នុងសង្កាត់មានជ័យ ខណ្ឌមានជ័យ។
ប្រភពព័ត៌មានពីតៃកុងរថយន្តកុងតឺន័រដែលត្រូវរថយន្តកុងតឺន័របុកចំពីជំហៀងបានឱ្យដឹងថា គាត់បានបើកបរថយន្តកុងតឺន័រមួយគ្រឿង ពាក់ស្លាកលេខ ក2513-ភព3 ដោយពុំមានដឹកទូកុងតឺន័រទេ បានធ្វើដំណើរតាមបណ្ដោយផ្លូវវែងស្រេងទិសដៅពីកើតទៅលិច ខណៈមកដល់ចំណុចកើតហេតុមុខស្ថានីយ៍ប្រេងឥន្ទនៈសូគីមិច ក៏មានរថយន្តកុងតឺមួយគ្រឿងទៀត មានសណ្ដោងទូកុងតឺន័រ ពុំមានស្លាកលេខ បានធ្វើដំណើរច្រាសទិសមកចំពីមុខ ឃើញដូចនោះគាត់ក៏បានបួងចង្កូតគេចក្បាលរថយន្តផុតក៏ត្រូវរថយន្តកុងតឺន័របុកចំពីជំហៀងបណ្ដាលអោយរងការខូចខាតទាំងសងខាងហើយតៃកុងរថយន្តដែលបើកបុកបានគាប់ជាប់ក្បាលរថយន្តរងរបួសបាក់ជើងម្ខាង។ បើតាមសម្ដីជនរងគ្រោះដែលជាតៃកុងរថយន្តរងរបួសបាក់ជើងម្ខាងបានសារភាពថា មកពីគាត់ងងុយដេកពេកក៏ងោកមួយភែងរេចង្កូតរថយន្តបុកចំរថយន្តកុងតឺន័រនោះតែម្ដង។បន្ទាប់ពីកើតហេតុជនរងគ្រោះត្រូវបានរថយន្តសាមុយមន្ទីរពេទ្យឯកជនដឹកបញ្ជូនទៅសង្គ្រោះភ្លាមៗតែម្ដង ចំណែកតៃកុងតឺន័រមួយគ្រឿងពុំមានរងរបួសអ្វីនោះទេ ហើយរថយន្តកុងតឺន័រទាំង២គ្រឿងនេះជារបស់ក្រុមហ៊ុនតែមួយរបស់ ផែស្ងួត អូលែរ។
ក្រោយពេលកើតហេតុសមត្ថកិច្ចបានចុះមកអន្តរាគមន៍ ដោយសាររថយន្តទាំង២គ្រឿងនេះជារបស់ក្រុមហ៊ុនតែមួយក៏ពុំមានធ្វើការប្ដឹងផ្ដល់អ្វីនោះទេ ទើបសមត្ថកិច្ចសម្រេចអោយម្ចាស់ក្រុមហ៊ុនយករថយន្តស្ទូចយករថយន្តទៅជួសជុលដោយខ្លួនឯង៕
មតិយោបល់