មណ្ឌលគីរី៖ ករណីចាប់ឈើប្រណិត ដែលស្តុបទុកនៅឃ្លាំងរបស់មេបញ្ជាការរងអាវុធហត្ថខេត្តម្នាក់ កំពុងកើតមានក្តីមន្ទិលសង្ស័យ ពីសំណាក់មហាជនថា អាចនឹងមិនមានលទ្ឋិផលទេ ព្រោះថាឈើប្រណិតទាំងនោះ ត្រូវបានគេប្រើឈ្មោះថ្នាក់ដឹកនាំជាន់ខ្ពស់ ដើម្បីកាងបទល្មើសខុសច្បាប់នេះ ។ ហេតុការណ៏ដែលមានភាពចម្រូងចម្រាសនេះ បានកើតឡើងនៅទីតាំងឃ្លាំងស្តុបឈើមួយ ក្នុងភូមិចម្ការតែ សង្កាត់ស្ពានមានជ័យ ក្រុងសែនមនោរម្យ ខេត្តមណ្ឌលគីរី វេលាម៉ោង៥ល្ងាចថ្ងៃទី៣១ ខែមីនា រហូតមកដល់ថ្ងៃទី១ ខែមេសា ២០១៤ គេនៅមិនទាន់ឃើញឈើប្រណិតសូម្បីមួយកំណាត់ណា ត្រូវបានជំនាញមេព្រៃ ចាត់ការតាមផ្លូវនៅឡើយទេ ។
ប្រភពពីមន្ត្រីជំនាញរដ្ឋបាលព្រៃឈើម្នាក់ បាននិយាយថា ក្រោយពីរុករកឃើញ ទីតាំងស្តុបឈើប្រណិតខាងលើរួចមក កម្លាំងជំនាញ បានឡោមព័ទ្ឋកន្លែងលាក់ឈើនោះ ។ ប្រភពបន្តថា បន្ទាប់ពីឡោមព័ទ្ឋ ទីតាំងនោះបន្តិចមក ស្រាប់តែមានការអន្តរាគម៏ ពីលោកមេបញ្ជាការ កងរាជអាវុធហត្ថ ខេត្តមណ្ឌលគីរីថា ឈើទាំងអស់នោះ គឺទុកសម្រាប់ធ្វើផ្ទះឲ្យមេនៅភ្នំពេញ ។ លោកមេបញ្ជាការ ក៏បានធានាអះអាងថា ឈើទាំងអស់នោះ មានការជាប់ពាក់ព័ន្ឋ ជាមួយអាវុធហត្ថ ដូច្នេះលោកសូមទទួលខុសត្រូវ ក្នុងការដឹកជញ្ជូនឈើទាំងនោះ ទៅឲ្យ ខណ្ឌរដ្ឋបាលព្រៃឈើ ដោយមិនឲ្យបាត់សូម្បីមួយកំណាត់ ។
លោក ភោគ ចន្ឋី មេបញ្ជាការរងកងរាជអាវុធហត្ថខេត្ត បានឲ្យដឹងថា ឈើទាំងអស់នោះ គឺក្រុមហ៊ុន បានឲ្យលោក សម្រាប់ទុកសាងសង់ផ្ទះប៉ុណ្ណោះ ពុំមែនជាការជួញដូរអ្វីទេ ។ លោកបញ្ជាក់ថា ឥឡូវនេះឈើ ទាំងអស់នោះ ត្រូវបានលោកប្រគល់ជូនក្រុមហ៊ុនវិញហើយ ដើម្បីកុំឲ្យមានបញ្ហាតទៅទៀត ។
ទោះជាយ៉ាងណា ការស្រាយបំភ្លឺខាងលើនេះ អាចគ្រាន់តែជាពាក្យដោះសារ យករួចខ្លួនមួយគ្រារប៉ុណ្ណោះ ព្រោះថា បើគ្រាន់តែយកមកសាងសង់ផ្ទះ ចាំបាច់អីត្រូវធ្វើឃ្លាំងធំយ៉ាងនេះ ហើយផ្ទុកសុទ្ឋតែជាឈើ ប្រណិតថែមទៀត ។ មជ្ឈដ្ឋាននានា បានកំពុងរង់ចាំមើលថា តើករណីចុះចាប់ឈើ ដ៏ចម្រូងចម្រាស់នេះ នឹងមានលិទ្ឋផលបែបណា ព្រោះប៉ះសុទ្ឋតែអ្នកធំ ៕
មតិយោបល់