វេលាម៉ោង ១១ និង ០០ នាទីរាត្រីនេះ ក្លិបកាំភ្លើងធំ និងទទួលភ្ញៀវ Hull City ក្នុងវគ្គផ្តាច់ព្រ័ត្រក្នុងក្របខណ្ឌ FA Cup នៅពហុកីឡដ្ឋាន Wembley Stadium ។តើរាត្រីនេះ ពាន FA Cup ជារបស់ កាំភ្លើងធំ Arsenal ឬ Hull City ?
អ្នកស្នេហាវិស័យកីឡាជាច្រើនបានទស្សន៍ទាយទុកមុន ថា ក្លិបកាំភ្លើងធំ Arsenal ពិតជាធ្វើបានសម្រេច ដោយបំបាក់ ក្លិប Hull City ក៏ប៉ុន្តែការជឿជាក់ដូច្នេះ ក៏ត្រឹមត្រូវដែរ ដោយសំអាងទៅលើហេតុផលមួយចំនួនទាំងក្នុងនិងក្រៅទឹកដី ដែលក្លិបទាំងពីរបានជួបគ្នា កន្លងមក កាំភ្លើងធំមិនដែលចាញ់ឡើយ ។ ជាក់ស្តែង កាលពីឆ្នាំ ២០០៩ Arsenal ធ្វើបានសម្រេចដោយបំបាក់ Hull City ក្នុងលទ្ធផល ២ – ១ ក្នុងក្របខណ្ឌ FA Cup ដូចគ្នា ។ វាជារឿង ពិបាកនិយាយដែរ សម្រាប់រដូវកាលនេះ បើទោះបីជា អ្នកគាំទ្រ និងគ្រូបង្វឹកក្លិប Arsenal ជឿជាក់ថា នឹងឈ្នះនៅរាត្រីនេះ តែកុំភ្លេចថា បាល់មូល វាអាចជារឿង ស៊យ បើខ្វះការប្រុងប្រយ័ត្ននោះ ។
នៅពេលនេះក្លិបកាំភ្លើងធំ Arsenal កំពុងធ្វើការវាយតម្លៃ ទៅលើកីឡាករ ពីររូបរបស់ខ្លួន Thomas Vermaelen និង Alex Oxlade-Chamberlain គូរតែដាក់លេង ក្នុងវគ្គផ្តាច់ព្រ័ត្រ FA Cup ប្រឆាំងជាមួយនឹង Hull City ។
ខ្សែបម្រើ Oxlade-Chamberlain មានបញ្ហាក្រលៀន ដោយមិនបានលេងតាំងពីថ្ងៃទី ២០ ខែ មេសា ខណ:ដែលខ្សែការពារ Vermaelen របួសក្បាលជង្គង់ ដោយមិនបានប្រកួតលីកចុងក្រោយជាមួយនឹងក្រុម។
ក្លិបកាំភ្លើងធំ នៅរាត្រីនេះសង្ឈឹមយ៉ាងមុតមាំថា អាចនឹងបញ្ចប់ដំណើរការរយ:ពេល ៩ ឆ្នាំ ដែលមិនអាចលើកពាន FA Cup ខណ:ដែលពានចុងក្រោយបំផុត ឈ្នះ Manchester United នៅឆ្នាំ ២០០៥ ដោយការស៊ុតប៉េណ័លទី។
សម្រាប់ការប្រកួតក្រុមទាំងពីរនេះដែរ អ្វីដែលធ្វើឲ្យគេភ័យជួស ក្លិបកាំភ្លើងធំ គឺខ្លាចតែ ក្រុមទាំងពីរនេះ ឈានដល់ដំណាក់កាលចុងក្រោយ ស៊ុតប៉េណ័ល និងមានរឿងចៃដន្យ ដោយកីឡាករ Arsenal ក្នុងចំណោម ៥ ដួង មាននរណាម្នាក់មិនអាចស៊ុតប៉េណ័លទី ចូល និងអាចនិយាយថា Hull City ដែលត្រៀមខ្លួនដូរទៅជា Tiger City នោះ ជាលាភសំណាងរបស់គេនៅរាត្រីនេះក៏ថាបាន៕
មតិយោបល់