ឯកឧត្តម វ៉ាត់ ចំរើន មានប្រសាសន៍ក្នុងសន្និសីទសារព័ត៌មាន នៅទីស្នាក់គណៈកម្មាធិការជាតិអូឡាំពិកកម្ពុជា នៅថ្ងៃទី ១០ ខែ មិថុនានេះឲ្យដឹងថា គោលបំណងសំខាន់៣ របស់ព្រឹត្តិការណ៍រត់ប្រណាំងឆ្នាំនេះគឺៈ ១.រត់ដើម្បីអបអរសាទរព្រះរាជពិធីបុណ្យចម្រើនព្រះជន្ម សម្តេចព្រះមហាក្សត្រី ព្រះនរោត្តម មុនីនាថ សីហនុ ព្រះរាជមាតាជាតិខ្មែរ, ២. អបអរសាទរខួបលើកទី១២០ ថ្ងៃកំណើតចលនាអូឡាំពិកទំនើប, ៣. ស្វែងរកមូលនិធិជួយដល់មន្ទីរពេទ្យគន្ធបុប្ផា។
មកទល់នឹងថ្ងៃនេះ អ្នកចុះឈ្មោះចូលរួមរត់ប្រណាំងមានចំនួន ២៩០០នាក់ ក្នុងនោះបរទេសមានប្រមាណជាង ១០០នាក់ មកពី ១៥ប្រទេស ដែលនេះជាចំនួន ជនបរទេសទាំងមកពីក្រៅប្រទេសទាំងកំពុងបម្រើការងារនៅកម្ពុជា ។
គួបញ្ជាក់ផងដែរថា អ្នកមានបំណងចុះឈ្មោះរត់ប្រណាំងអាចទៅចុះឈ្មោះនៅមុខព្រះបរមរាជវាំង វេលាម៉ោង ៨:០០នាទីព្រឹក ដល់ ៥:០០នាទីល្ងាច ថ្ងៃទី១៣ និង ១៤មិថុនាការផ្ដល់អាវ និង លេខសម្គាល់សម្រាប់រត់គឺធ្វើនៅមុខព្រះបរមរាជវាំងតែម្ដង ។ ក្នុងព្រឹត្តិការណ៍នេះមានវិញ្ញាសារត់២១គីឡូម៉ែត្រ(ពាក់កណ្ដាលម៉ារ៉ាតុង)បុរស- នារី រត់ចម្ងាយ ១០គីឡូម៉ែត្របុរស-នារី និង រត់៣គីឡូម៉ែត្រជាលក្ខណៈគ្រួសារ ឆ្នាំនេះព្រឹត្តិការណ៍ម៉ារ៉ាតុងទាំងអស់នៅកម្ពុជា ត្រូវបានទទួលស្គាល់ដោយសហគមន៍ម៉ារ៉ាតុងអន្តរជាតិ ។
ក្នុងទិវានេះដែរវិទ្យាស្ថានជាតិអប់រំកាយ និង កីឡាបានផ្ដល់គរុសិស្សចំនួន១០០នាក់មកធ្វើការងារដោយស្ម័គ្រចិត្ត សម្រាប់ព្រឹត្តិការណ៍នេះ ។ ក្រុមហ៊ុនប្រមូលសម្រាម CINTRY ក៏បានដាក់កម្លាំងសម្អាតក្នុងតំបន់ប្រារព្ធពិធីដើម្បីឲ្យ ទីនោះស្ថិតក្នុងភាពស្អាតជានិច្ច ៕
មតិយោបល់