ភ្នំពេញ៖ នៅថ្ងៃព្រហស្បតិ៍ទី១៩ខែមិថុនា ឆ្នាំ ២០១៤ នេះ ទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ (USAID) បានចេញសេចក្ដីប្រកាសផ្តល់ជំនួយជាទឹកប្រាក់១៦លានដុល្លារអាមេរិក លើគម្រោងអាហារូបត្ថម្ភក្នុងការកែលម្អជីវិតរស់នៅម្តាយ និងកុមារតូចៗក្នុងរយៈពេល៥ឆ្នាំ។
នៅក្នុងសេចក្ដីប្រកាសបានបញ្ជាក់ឲ្យដឹងនូវកម្មវិធីចម្រុះស្តីពីអនាម័យ និងអាហារូបត្ថម្ភសម្រាប់កែលម្អជីវិតរស់នៅរបស់ម្តាយ និងកុមារតូចៗ តាមរយៈការបង្រៀនពីទម្លាប់រស់នៅស្អាត និងអាហារូបត្ថម្ភល្អ និងការបង្កើនការប្រើប្រាស់បង្គន់អនាម័យ។
គម្រោងដែលមានទឹកប្រាក់ចំនួន ១៦លានដុល្លារអាមេរិកនេះ ត្រូវផ្តល់សម្រាប់រយៈពេល ៥ឆ្នាំ នឹងជួយដល់មនុស្សប្រមាណ ៥០០.០០០នាក់ ជាពិសេសស្ត្រីមានផ្ទៃពោះ កុមារតូចៗ ម្តាយ អ្នកមើលថែទាំកុមារ និងសហគមន៍ជនបទនៅខេត្តបាត់ដំបង ពោធិ៍សាត់ និងសៀមរាប។
លោកស្រី Rebecca Black ប្រធានទីភ្នាក់ងារ USAID បានមានប្រសាសន៍ថា “អាហារូបត្ថម្ភគឺជាអាទិភាពមួយ ពីព្រោះវាគឺជាគន្លឹះសម្រាប់ធ្វើឲ្យរាងកាយ និងខួរក្បាលមានសុខភាពល្អ។ លោកស្រីថាកង្វះអនាម័យមានការទាក់ទងនឹងស្ថានភាពអាហារូបត្ថម្ភមិនល្អរបស់កុមារ និងមាតា។តាមរយៈការដោះស្រាយបញ្ហាប្រឈមទាំងពីរនេះជាមួយគ្នា និងស្របជាមួយកម្មវិធីសុខភាព និងកម្មវិធីកសិកម្មដែលកំពុងដំណើរការទៅ លោកស្រីរំពឹងថា នឹងមានភាពប្រសើរឡើងនៃសុខភាពរបស់កុមារ និងមាតានៅកម្ពុជា”។
កុមារនៅកម្ពុជាជាងមួយភាគបីដែលស្ថិតក្នុងអាយុក្រោម៥ឆ្នាំ មិនអាចមានកម្ពស់ ទម្ងន់ និងការលូតលាស់ខួរក្បាលសមស្របទេ ដោយសារកង្វះអាហារូបត្ថម្ភរ៉ាំរ៉ៃ។
របាយការណ៍របស់អង្គការសុខភាពពិភពលោក និងអង្គការ UNICEF បានបញ្ជាក់ថា ប្រជាជនកម្ពុជាមានតែ២០ភាគរយ ប៉ុណ្ណោះដែលអាចរស់នៅក្នុងស្ថានភាពមានអនាម័យអាចទទួលយកបាន៕
មតិយោបល់