យោងតាមរបាយការណ៍របស់ក្រសួងពាណិជ្ជកម្ម ចុះថ្ងៃទី១៣ ខែកក្កដា ឆ្នាំ២០១៤ បានឲ្យដឹងថា នៅក្នុងឆមាសទី១ ឆ្នាំ២០១៤ ទំហំពាណិជ្ជកម្មនៃការនាំចេញ-នាំចូលសរុបរបស់កម្ពុជាមានទំហំទឹកប្រាក់៨,៩៥ ពាន់លានដុល្លារអាម៉េរិក កើនឡើង១៧,៦ ភាគរយលើសកាលពីឆមាសទី១ ក្នុងឆ្នាំ២០១៣ ដែលមានទំហំទឹកប្រាក់៧,៦១ ពាន់លានដុល្លារអាម៉េ រិក។
របាយការណ៍នោះក៏បានបង្ហាញឲ្យដឹងទៀតថា ទំហំការនាំចេញរបស់កម្ពុជាចន្លោះពីខែមករារហូតដល់ខែមិថុនា ឆ្នាំ២០១៤ មានចំនួនទឹកប្រាក់៣,៧៧ ពាន់លានដុល្លារអាម៉េរិកដែលតួលេខនេះបានកើនឡើង២០ បើធៀបនឹងរយៈពេលដូចគ្នាកាលពីឆ្នាំ២០១៣ ដែលមានចំនួន៣,១៤ ពាន់លានដុល្លារអាម៉េរិក។ ដោយឡែកសម្រាប់ការនាំចូលវិញ មានទំហំទឹកប្រាក់ ៥,១៨ ពាន់លានដុល្លារអាម៉េរិកបានកើនឡើង១៦ ភាគរយលើសឆមាសទី១ កាលពីឆ្នាំ២០១៣ ដែលមានចំនួនទឹកប្រាក់តែ៤,៤៧ ពាន់លានដុល្លារអាម៉េរិកប៉ុណ្ណោះ។
លោក កែន រដ្ឋា អ្នកនាំពាក្យក្រសួងពាណិជ្ជកម្មបានឲ្យដឹងថា ការកើនឡើងសម្រាប់ការនាំចេញ-នាំចូលរបស់កម្ពុជានៅក្នុងឆមាសទី១ ឆ្នាំ២០១៤ នេះ ដោយសារកម្ពុជាមានស្ថិរ ភាពម៉ាក្រូសេដ្ឋកិច្ច និងបរិយាកាសវិនិយោគល្អ ដែលកំពុងទាក់ទាញវិនិយោគទាំងមកពីក្នុងតំបន់ និងជុំវិញពិភពលោកផងដែរ។ ការកើនឡើងនូវចំនួនវិនិយោគយ៉ាង ឆាប់រហ័សរបស់កម្ពុជាពីបណ្តាប្រទេសដៃគូដូចជា ចិន ជប៉ុន កូរ៉េ ថៃ និងម៉ាឡេស៊ី នៅក្នុង ពេលថ្មីៗនេះនឹងជួយជំរុញដល់ការនាំចេញឲ្យមានសន្ទុះខ្លាំងក្លានៅក្នុងពេលអនាគត។
មតិយោបល់