ភ្នំពេញ ៖ កាលពីវេលាម៉ោង៧ព្រឹក ថ្ងៃទី១០ខែសីហា២០១៤ សាកសពបុរសជាកម្មករសំណង់ម្នាក់ ត្រូវបានប្រជាពលរដ្ឋប្រទះឃើញហើមអណ្តែតផ្កាប់មុខ ស្ថិតនៅនិងទឹកត្រពាំងក្នុងក្រុមទី៤ ភូមិត្រពាំងជ្រៃ សង្កាត់កាកាប ខណ្ឌពោធិ៍សែនជ័យ ធ្វើឲ្យភ្ញាក់ផ្អើលដឹងដល់កម្លាំងសមត្ថកិច្ចអាជា្ញធរចុះទៅធ្វើការត្រួតពិនិត្យដល់កន្លែងកើតហេតុ ។
លោកជិន ភាព អាយុ៣៤ឆ្នាំ មុខរបរកម្មករសំណង់ ស្នាក់នៅក្នុងបុរីអាកាសចរណ៍បានឲ្យដឹងថា សាកសពបុរសដែលគេប្រទះឃើញខាងលើនោះ ឈ្មោះពៅ ហៅ ប៉យ អាយុ២៤ឆ្នាំ ជាកម្មករសំណង់ ស្នាក់នៅក្នុងបុរីអាកាសចរណ៍ និងមានស្រុកកំណើតនៅឯខាងខេត្តមណ្ឌលគិរី ។ ជនរងគ្រោះ បានបាត់ពីកន្លែងធ្វើការ និងស្នាក់នៅ ២យប់ ២ថ្ងៃកន្លងមកហើយ ដោយពួកគេនឹកស្មានថា ជនរងគ្រោះវិលទៅស្រុកកំណើតតែផ្ទុយទៅវិញ បែរជាឃើញក្លាយជាអណ្តែតក្នុងទឹកនេះទៅវិញ ។
សមត្ថកិច្ចជំនាញ បានចុះស្រង់សាកសពឡើងលើគោក និងធ្វើការពិនិត្យ សពមានកម្ពស់ ១,៦៥ម៉ែត្រ ដៃច្បាមជាប់សុទ្ធតែភក់ ពោះពេញដោយទឹក ការសន្និដ្ឋានឃើញថា ជនរងគ្រោះអាចស្រវឹងស្រា ហើយដើរធ្លាក់ទឹកត្រពាំងខាងលើ លិចលង់ឈ្លក់ទឹកស្លាប់តែម្តង។ ក្រោយពីការពិនិត្យរួច សពត្រូវបានគេដឹកកទៅតំកល់ទុកនៅវត្តពោធិ៍ចិនតុង រង់ចាំស្រាវជ្រាវរកសាច់ញាតិមកទទួលយកទៅធ្វើបុណ្យតាមប្រពៃណី៕
មតិយោបល់