Apple ត្រូវបាន​គេ​រំពឹងថា នឹង​បង្ហាញ iPhone ថ្មី​ចំនួន ពីរ​ម៉ូ​ដែល ដែល​មាន​ទំហំ​អេក្រង់​ផ្សេងគ្នា​នៅ​ឆ្នាំ​នេះ ដើម្បី​ប្រជែង​មួយ​នឹង​ក្រុមហ៊ុន​ផលិត​ស្មា​ត​ហ្វូន​ផ្សេងៗ ជាពិសេស​គឺ Samsung​។​

​យោងតាម​សេចក្ដីរាយការណ៍​ជា​ច្រើន​បានឲ្យដឹងថា iPhone ម៉ូ​ដែល​ថ្មី​នោះ មួយ​ត្រូវបាន​គេ​រំពឹងថា មាន​អេក្រង់​ទំហំ ៤,៧​អ៊ីង និង​មួយទៀត​ទំហំ ៥,៥​អ៊ីង ហើយ​ប្រហែលជា​មាន​ឈ្មោះ​ថា iPhone 6​។ ប៉ុន្តែ​សេចក្ដីរាយការណ៍​ថ្មី​នៅ​ពេល​នេះ ត្រូវបាន​គេ​បញ្ជាក់ថា iPhone ថ្មី​របស់ Apple មានឈ្មោះ​ថា iPhone 6 និង iPhone 6L​។​

​សារព័ត៌មាន Business Insider បាន​ចុះផ្សាយ​ដោយ​ដកស្រង់​ពី​ប្រភព​ច្បាស់ការ​មួយ​មក​ពី​ប្រទេស​ចិន ថា iPhone អេក្រង់​ទំហំ ៤,៧​អ៊ីង មានឈ្មោះ​ថា iPhone 6 ចំណែក iPhone អេក្រង់​ទំហំ ៥,៥​អ៊ីង មានឈ្មោះ​ថា iPhone 6L (L មកពី​ពាក្យ Large)​។​

​កាលពី​ឆ្នាំមុន ក្រុមហ៊ុន Apple បានបង្ហាញ iPhone 5C ដែល​ពាក្យ C មកពី​ពាក្យ​ថា Color ហើយ​សម្រាប់​ពេល​នេះ L មកពី​ពាក្យ​ថា Large តើ​អាច​ទៅ​រួម​ទេ​?

​គួរ​បញ្ជាក់​ផង​ដែរ​ថា ប្រភព​ព័ត៌មាន​ជាច្រើន​បាន​អះអាង​ថា iPhone ថ្មី​នឹង​បង្ហាញ​ខ្លួន​នៅ​ពាក់កណ្ដាល​ខែ​កញ្ញា ហើយ​ចេញ​លក់​នៅ​ក្រោយ​ពេល​បង្ហា​ញ​ខ្លួន​បាន​មួយ​សប្ដាហ៍​៕​