កំពង់ចាម៖ ស្ត្រីម្នាក់បានស្លាប់យ៉ាងវេទនា ក្រោមត្បូងចបរបស់ឃាតក ប្រមូលយកខ្សែក និង ចិញ្ជៀនប្លាកទីន តាំងពីព្រឹកថ្ងៃទី២ ខែតុលា ឆ្នាំ២០១៤ រហូតដល់ល្ងាចទើបក្រុមគ្រួសារនិងសមត្ថកិច្ចរកឃើញ នៅចំណុចវាលស្រែច្រឡៃ ស្ថិតក្នុងភូមិជយោ ឃុំជយោ ស្រុកចំការលើ ខេត្តកំពង់ចាម ។
លោក វរៈសេនីយ៍ត្រី លាវ សុភា មេបញ្ជាការកងរាជអាវុធហត្ថស្រុកចំការលើបានឲ្យដឹងថា ករណីឃាតកម្មនេះបានកើតឡើងតាំងពីព្រឹកថ្ងៃកើតហេតុខាងលើ នៅពេលដែលស្ត្រីជាជនរងគ្រោះ ឈ្មោះ ឃីន បុល អាយុ៤០ឆ្នាំ រស់នៅភូមិកើតហេតុបានទៅពិនិត្យមើលស្រូវក្នុងស្រែរបស់ខ្លួន ដែលភ្ជាប់ដោយសម្ភារៈមានចបកាប់ចំនួន១យកភ្ជាប់ទៅជាមួយ ទុកគ្រាន់បិទបើកទឹកស្រែ ។ តាមការស្រាវជ្រាវពីអ្នកជិតខាងបានឲ្យដឹងថា គេឃើញស្ត្រីជនរងគ្រោះ បានបាត់ពីផ្ទះតាំងពីព្រឹក លុះដល់ល្ងាចទើបសាច់ញាតិ ក្រុមគ្រួសារនាំគ្នាឆោឡោរក ស្រាប់តែឃើញសាកសពនៅ ចំណុចកើតហេតុ ខាងលើតែម្តង ។
សមត្ថកិច្ចកងរាជអាវុធហត្ថស្រុកចំការលើ ពិនិត្យលើសាកសពទៅនឹងយោងតាមចម្លើយរបស់ក្រុមគ្រួសាររងគ្រោះឃើញថា ស្ត្រីរងគ្រោះ ឃាតក បានសម្លាប់នឹងត្បូងចបវាយត្រូវក្បាលផ្នែកខាងក្រោយជាច្រើនចបបណ្តាលឲ្យស្លាប់ រួចគេបានប្រមូលយកខ្សែកប្លាកទីនចំនួន១ខ្សែ និងចិញ្ជៀនប្លាកទីនចំនួន២វង់ផងដែរ សរុបទម្ងន់ ចំនួន៧ជីប្លាកទីន ។ ក្រោយពេលកើតហេតុជនដៃដល់បានរត់គេចខ្លួនបាត់ស្រមោលតែម្តងទៅ ។ ដោយឡែកវត្ថុតាង កម្លាំងប្រមូលបានមានចបកាប់ចំនួន១ ចបនោះជាចបរបស់ជនរងគ្រោះថែមទៀត ។ សមត្ថកិច្ចសន្និដ្ឋានថា ស្ត្រីរងគ្រោះបានស្លាប់ដោយត្បូងចបនោះ យ៉ាងពិតប្រាកដ ។
លោកមេបញ្ជាការបានបញ្ជាក់ទៀតថា ស្ត្រីរងគ្រោះមានកូនចំនួន៤នាក់ ប្រុស២នាក់ និងស្រី២នាក់ ហើយប្តីរបស់គាត់បានចេញទៅធ្វើកម្មករនៅក្រៅប្រទេស បច្ចុប្បន្នសាកសពត្រូវក្រុមគ្រួសារយកមកធ្វើបុណ្យទៅតាមប្រពៃណី ។ សមត្ថកិច្ចកំពុងតែស្រាវជ្រាវ ដើម្បីកំណត់មុខសញ្ញា តាមចាប់ខ្លួនឃាតក យកមកផ្តន្ទាទោសទៅតាមនិតិវិធី ៕
មតិយោបល់