រឿងដ៏ធំបំផុតចុងក្រោយក្នុងប្រទេសឥណ្ឌូនេស៊ីគឺ ការបាត់ខ្លួនយន្តហោះ QZ8501 ធ្វើឲ្យពិភពលោកភ្ញាក់ផ្អើលសារជាថ្មីម្តងទៀត បន្ទាប់ពី MH370 មិនទាន់រកឃើញនៅឡើយនោះ ។
នាង Anggi Ranastianis Angela អាយុ ២២ ឆ្នាំ ដែលត្រូវជាកូនស្រី លោក Iriyanto អ្នកបើកយន្តហោះ QZ8501 ដែលបានបាត់ខ្លួន ហើយកាលពីម្សិលមិញនេះនាងបានសរសេរលើបណ្តាញសង្គមថា “លោកប៉ាមកផ្ទះវិញ អ្នកជាឪពុកដ៏ចាំបាច់ ត្រឡប់មករកខ្ញុំវិញមក ប៉ាប៉ាដាច់ខាតត្រូវតែមកវិញ” ។
យោងតាមសារព័ត៌មាន Guardian បានចុះផ្សាយថា អ្នកបើកយន្តហោះខាងលើ នៅមានកូនស្រីម្នាក់ទៀត អាយុ ៧ ឆ្នាំ ឈ្មោះ Arya Galih Gegana ។
ប្រភពខាងលើបានបន្តថា ក្មេងស្រីទាំងពីរនាក់នេះ រស់នៅខេត្ត Yogyakarta ជាកូនស្រីលោក Iriyanto អ្នកបើកយន្ត QZ8501 ឲ្យ ក្រុមហ៊ុន AirAsia ដែលបានបាត់ខ្លួនកាលពីថ្ងៃម្សិលមិញនេះ ។ ជាងនេះទៅទៀត ប្រពន្ធរបស់ លោក Iriyanto នាង Ida បានចាក់សោរឃុំខ្លួនឯង ក្នុងបន្ទប់ បន្ទាប់ពីទទួលបានព័ត៌មាន យន្តហោះដែលប្តីបើកនោះ បាត់ខ្លួន ។
ក្មួយស្រី របស់អ្នកបើកបរខាងលើ បានប្រាប់សារព័ត៌មាន Detik.com ថា លោកពូ Iriyanto គាត់ជាមនុស្សល្អ និងយកចិត្តទុកដាក់លើការងារខ្លាំងណាស់ រួមទាំងសាច់ញាតិផងដែរ ហើយក៏មិនបដិសេធ ជួយនរណាម្នាក់ នៅពេលដែលពួកគេត្រូវការ ជាពិសេសប្រាក់កាក់តែម្តង។
តាមរបាយការណ៍ ពី AirAsia បានបញ្ជាក់ថា លោក Iriyanto ដែលជាអតីតអ្នកបើកយន្តចម្បាំង Air Force F16 របស់ឥណ្ឌូនេស៊ីមានបទពិសោធន៍ បើកបរ ២០៥៣៧ ម៉ោង ហើយក៏ជាសមាជិកក្លិបម៉ូតូ Besar ផងដែរ។
ម្សិលមិញនេះដែរ QZ8501 ជាឈ្មោះយន្តហោះ ក្រុមហ៊ុន AirAsia បានបាត់ខ្លួនពីប្រព័ន្ធតាមដាន ដែលធ្វើដំណើរពី ឥណ្ឌូនេស៊ី ទៅ សឹង្ហបុរី ដែលមានអ្នកដំណើរ ១៥៥ នាក់ និង សហនាវិក ៧ នាក់ ។ មុនយន្តហោះនេះបាត់ខ្លួន អ្នកបើកបរខាងលើបានប្រកាសពីអាកាសធាតុត្រជាក់ និងអាក្រក់ ជូនដល់ស្ថានីយ៍ ៕
មតិយោបល់