​តារាចម្រៀង Jaycee Chan កូនប្រុស​របស់​កំពូល​តារា​សម្ដែង​កុង​ហ្វូ ឈិន ឡុង (Jackie Chan) បាន​សរសេរ​សំបុត្រ​រៀបរាប់​ពី​ទុក្ខសោក និង​ត្អូញត្អែរ​ការមិន​យកចិត្តទុកដាក់​របស់​ឪពុក​ខ្លួន​តាំងពី​កុមារភាព​។​
Jaycee Chan បាន​សរសេរ​នៅក្នុង​សំបុត្រ​ថា តាំង​ពី​តូច​ដល់​ធំ​គឺ​ស្រឡាញ់​ម្ដាយ​ច្រើន​ជាង​ឪពុក ព្រោះ​ថា​ឪពុក​របស់​ខ្លួន​ជា​មនុស្ស​រវល់​ច្រើន ដូច្នេះ​ធ្វើឲ្យ​គេ និង​ឪពុក​ពុំ​សូវ​មាន​ទំនាក់ទំនង​ជិតស្និទ្ធ​នឹង​គ្នា ហើយ​បើទោះបីជា​កាលពី​ថ្ងៃ​ទី​០៩​ខែ​មករា ឆ្នាំ ២០១៥ កន្លងទៅនេះ ពុំ​ឃើញ​វត្ត​មាន​ឪពុក​ម្ដាយ​នៅក្នុង​តុលាការ​ក្ដី ប៉ុន្តែ​គេ​ដឹងថា ពួកគាត់​ទាំង​ពីរ​នាក់ បាន​ព្យាយាម​រក​វិធីសាស្ត្រ​ដើម្បីឲ្យ​គេ​ឆាប់​ចេញពី​គុក​។​

Jaycee បាន​និយាយថា គេ​ប្រើ​ថ្នាំញៀន នៅពេលដែល​គេ​ពិបាកចិត្ត ប៉ុន្តែ​គេ​បាន​សន្យាថា នឹង​មិន​ធ្វើឲ្យ​មាន​កំហុសឆ្គង​ម្ដងទៀត​ឡើយ​។ Jaycee បាន​ធ្វើ​ខួបកំណើត​គម្រប់​អាយុ ៣២​ឆ្នាំ​នៅក្នុង​គុក ដោយ​ពុំ​មាន​វត្តមាន​ឪពុកម្ដាយ ប៉ុន្តែ​មេធាវី​គេ​បាន​និយាយថា ឪពុក​ម្ដាយ​របស់​គេ​បាន​ផ្ញើ​ពាក្យ​ជូនពរ​នៅ​ថ្ងៃ​ខួបកំណើត​។ នៅក្នុង​អំឡុង​ពេល​ចាប់​ដាក់គុក Jaycee បាន​អាន​សៀវភៅ​ជា​ង ១០០​ក្បាល់ និង​សរសេរ​បទ​ចម្រៀង​បាន​មួយ​ចំនួន​ផងដែរ​។​
​យោង​តាម​ការកាត់ទោស​របស់​តុលាការ Jaycee ត្រូវ​ជាប់គុក ៦​ខែ និង​ពិន័យ​ជា​ប្រាក់ ៣២២​ដុល្លារ​អាមេរិក ពី​បទ​ប្រើប្រាស់​គ្រឿងញៀន ហើយ​បើសិនជា​គិត​ចាប់តាំងពី​ចាប់ខ្លួន កាលពី​ខែ​សីហា​មក Jaycee អាច​នឹង​ចេញពី​គុក​នៅ​ខែ​កុម្ភៈ ពោល​គឺ​មុន​ថ្ងៃបុណ្យ​នៃ​ក្ដី​ស្រឡាញ់​។​
​គួរ​បញ្ជាក់​ផង​ដែរ​ថា នៅក្នុង​ឆ្នាំ ២០១៤ មិនមែន​មាន​តែ Jaycee ដែល​ត្រូវ​ចាប់ខ្លួន​ពី​បទ​ប្រើប្រាស់​គ្រឿងញៀន​នោះ គឺ​មាន​តារា​ចម្រៀង​ប្រុស លោក Li Daimo, អ្នកដឹកនាំ​រឿង​លោក Zhang Yuan, តារា​សម្ដែង​ប្រុស លោក Gao Hu, Zhang Mo, Roy Cheung, អ្នកសរសេរ​សាច់រឿង Ning Caishen, ពិធីក​រលោក Wang Jing និង​កំពូល​តារាចម្រៀង​ចិន Yin Xiangjie៕​