សារជាថ្មីម្តងទៀតហើយ អាជ្ញាធរអប្សរាបានរងការចោទប្រកាន់ពីទំព័រហ្វេសប៊ុកមួយដោយចោទប្រកាន់ថា បានឃុបឃិតជាមួយនឹងក្រុមហ៊ុនឥណ្ឌា ជីកយកម្កុដបូរាណ ដែលមានអាយុកាល ជាងមួយពាន់ឆ្នាំ ។
ទំព័រមួយដែលមានឈ្មោះថា កំពូលអ្នកចែករំលែក បានសរសេរនៅលើហ្វេសប៊ុកខ្លួនថា “ប្រភពដែលជឿទុកចិត្តបាន បានឲ្យដឹងថា អាជ្ញាធរអប្សរា និងក្រុមហ៊ុនឥណ្ឌា ដែលទទួលបានសិទ្ធិក្នុងការជួសជុលអង្គរ បានឃុបឃិតគ្នា ជីកយកម្កុដបូរាណ ដែលមានអាយុកាល រាប់ពាន់ឆ្នាំនៅជិតគ្រឹះប្រាសាទតាព្រហ្ម ។ បើតាមការអះអាងរបស់អ្នកបូរាណវិទ្យាដែលសុំមិនបញ្ចេញឈ្មោះ បានឲ្យដឹងថា ម្កុដនេះ មានតម្លៃរាប់សិបលានដុល្លារ ។ ក្នុងនាមយើងខ្ញុំជាកូនខ្មែរ សូមធ្វើការថ្កោទោសនូវទង្វើបំផ្លាញជាតិរបស់អាជ្ញាធរអប្សរា និងទារដាច់ខាតឲ្យក្រសួងពាក់ព័ន្ធ ធ្វើការ ស៊ើបអង្កេតក្នុងរឿងនេះ និងចាត់តាមផ្លូវច្បាប់ជាបន្ទាន់” ។
ជាមួយនឹងបញ្ហានេះដែរ យើងមិនទាន់អាចសុំការស្រាយបំភ្លឺ នឹងអាជ្ញាធរខាងលើ ថារឿងនេះជារឿងពិតឬយ៉ាងណា ? ហេតុដូចនេះសុំតាមដានព័ត៌មានមួយនេះជាបន្តនៅពេលក្រោយ ៕
មតិយោបល់