(ឆែក)៖ សាធារណរដ្ឋឆែកបានប្រកាសបណ្ដេញមន្ត្រីទូតរុស្ស៊ី១៨នាក់ចេញពីប្រទេស ដោយចោទថាទីក្រុងម៉ូស្គូមានជាប់ពាក់ព័ន្ធនឹងការផ្ទុះឃ្លាំងអាវុធមួយ កាលពីឆ្នាំ២០១៤។

បើតាមប្រព័ន្ធផ្សព្វផ្សាយឆែក ការសម្រេចចិត្តបណ្ដេញមន្ត្រីទូតរុស្ស៊ីគឺជាការឆ្លើយតបទៅនឹងភស្ដុតាងដែលទីភ្នាក់ងារស៊ើបការណ៍សម្ងាត់ឆែកទទួលបានថា រុស្ស៊ីមានជាប់ពាក់ព័ន្ធនឹងហេតុការណ៍ផ្ទុះឃ្លាំងអាវុធមួយនៅក្នុងសាធារណរដ្ឋឆែក កាលពីឆ្នាំ២០១៤ ដោយបានផ្ដាច់ជីវិតមនុស្ស២នាក់។

រដ្ឋមន្ត្រីមហាផ្ទៃ និងជារដ្ឋមន្ត្រីការបរទេសស្ដីទីឆែក លោក ជែន ហាម៉ាសេគ (Jan Hamacek) នៅក្នុងសេចក្ដីថ្លែងការណ៍ចេញផ្សាយកាលពីថ្ងៃសៅរ៍ចុងសប្ដាហ៍នេះ (ម៉ោងក្នុងតំបន់) ក៏បានបញ្ជាក់ដែរថាការបណ្ដេញមន្ត្រីទូតរុស្ស៊ីខាងលើធ្វើឡើងបន្ទាប់ពីអាជ្ញាធរឆែករកឃើញថាអ្នកទាំងនោះគឺជាសមាជិកទីភ្នាក់ងារស៊ើបការណ៍ សម្ងាត់រុស្ស៊ី ហើយពួកគេមានរយៈពេល៤៨ម៉ោងដើម្បីចាកចេញពីសាធារណរដ្ឋឆែក៕

Reuters៖ ថ្ងៃទី១៨ ខែមេសា ឆ្នាំ២០២១