ពិធីបុណ្យសាសនាជ្វីហ្វមួយនេះតែងរៀបចំជារៀងរាល់ឆ្នាំនៅទីងងឹតមួយស្ថិតប៉ែកខាងជើងប្រទេស។ ចំណែកហេតុការណ៍ឆោឡោជាន់គ្នាបានកើតមានឡើង ខណ:ដែលមានមនុស្សជាច្រើនពាន់នាក់កំពុងបន់ស្រន់ ស្មឹងស្មាត។ ពេញមួយយប់ថ្ងៃព្រហស្បតិ៍ ទី២៩ ឆ្លងចូលថ្ងៃសុក្រ ទី៣០ មេសា ក្រុមអ្នកជួយសង្រ្គោះបានជួយរំដោះអ្នករងរបួស និងយកសាកសពចេញពីកន្លែងកើតហេតុ។ រដ្ឋអំណាចបានប្រើឡានពេទ្យ និងឧទ្ធម្ភាគចក្រដើម្បីដឹកអ្នករបួសទៅកាន់មន្ទីរពេទ្យចំនួន ២ ដែលស្ថិតនៅតំបន់ជិតកន្លែងហេតុជាងគេ។ អ្នកកាសែតម្នាក់ដែលបានឃើញហេតុការណ៍ផ្ទាល់ភ្នែកបានរៀបរាប់ពីរូបភាពអាណោចអាធ័មដែលមនុស្សស្ថិតគរលើគ្នា និងដើរជាន់លើគ្នាដោយម្នាក់ៗប្រឹងរើសបម្រះចេញពីការសង្កត់ពីអ្នកផ្សេង។
អ្នកស្លាប់ និងអ្នករបួសធ្ងន់ ស្រាលភាគច្រើនដែលត្រូវបានគេជាន់សង្កត់ពីលើមិនអាចរើរួចរហូតដល់ថប់ដង្ហើមស្លាប់។ រូបភាពផ្សេងទៀត គឺការស្ថិតនៅរប៉ាត់រប៉ាយ ពាសវាល ពាសកាលនឹងដីនូវសម្លៀកបំពាក់សាសនា មួក និងសៀវភៅ។ នាយករដ្ឋមន្រ្តីអ៊ីស្រាអែលលោកនេតាន់យ៉ាហ៊ូបានធ្វើដំណើរទៅដល់កន្លែងកើតហេតុនាវេលាថ្ងៃត្រង់ក្នុងថ្ងៃសុក្រ ទី៣០ មេសា។ «គ្រោះមហន្តរាយដ៏ធំ» នេះជាប្រសាសន៍របស់លោកនេតាន់យ៉ាហ៊ូដោយបានអំពាវនាវឲ្យប្រជាជនបន់ស្រន់ដើម្បីឲ្យអ្នករងរបួសឆាប់ជាសះស្បើយ។ ការអំពាវនាវដូចគ្នានេះក៏មានពីប្រមុខគណបក្សប្រឆាំងលោកយ៉ាអៀរ ឡាពីដ។
ប្រធានក្រុមប្រឹក្សាអឺរ៉ុបលោក Charles Michel ចូលរួមរំលែកទុក្ខជាមួយប្រជាជនអ៊ីស្រាអែលនៅក្នុងហេតុការណ៍ដ៏សោកសៅនេះ។ សារដូចគ្នាក៏មានពីសហភាពអឺរ៉ុប និងប្រទេសបារាំង។ ពិធីបុណ្យសាសនាជ្វីហ្វប្រចាំឆ្នាំនេះជាការជួបជុំមនុស្សជាសាធារណ:យ៉ាងច្រើនសម្បើមដំបូង គិតតាំងពីផ្ទុះវិបត្តិកូវីដ១៩ ជាងមួយឆ្នាំកន្លងទៅ។ តាមកាសែតក្នុងស្រុក មានមនុស្សដល់ទៅ ១០ម៉ឺននាក់ដែលមានវត្តមាននៅខាងក្នុងទីងងឹតនៃពិធីបុណ្យសាសនានោះ។ តាមធម្មតា រដ្ឋអំណាចបានអនុញ្ញាតឲ្យមានវត្តមាននៅក្នុងទីងងឹតតែ ១០ ០០០នាក់ប៉ុណ្ណោះ។ ខណ:នេះ ការស៊ើបអង្កេតមួយបានចាប់ផ្តើមដើម្បីស្វែងរកមូលហេតុដែលបានបណ្តាលឲ្យមនុស្សឆោឡោរត់ជាន់គ្នានៅក្នុងពិធីបុណ្យសាសនានោះ៕
មតិយោបល់