ព័ត៌មានជាតិ

អភិបាលរាជធានីភ្នំពេញចុះពិនិត្យស្ថានភាពផ្លូវដែក ដើម្បីឈានទៅស្ថាបនាផ្លូវបេតុងលើគម្រោងម្ខាង១០ម៉ែត្រ

ភ្នំពេញ: អភិបាលរាជធានីភ្នំពេញ លោកប៉ា សុជាតិវង្ស អមដំណើរដោយមន្ត្រីជំនាញ​និង​អាជ្ញាធរដែនដីនារសៀលថ្ងៃទី០២ ខែកញ្ញានេះ បានចុះពិនិត្យមើលស្ថានភាពផ្លូវដែក ដែលទុកចោលជាច្រើនឆ្នាំ ហើយការចុះធ្វើការត្រួតពិនិត្យនេះធ្វើឡើងក្នុងគោល ដើម្បីឈានទៅដល់ការស្ថាបនា​ផ្លូវបេតុងលើគម្រោ​ង​ម្ខាង១០​ម៉ែត្រ តាមបណ្តោយផ្លូវរថភ្លើងនេះ។

លោកសាំ ពិសិដ្ឋ នាយកមន្ទីរសាធារណការ និងដឹកជញ្ជូន រាជធានីភ្នំពេញបានឲ្យដឹងថា កំណាត់ផ្លូវរថភ្លើងដែល​ត្រូវ​ស្ថាបនាជាផ្លូវបេតុងនេះត្រូវធ្វើឡើងដោយចែកចេញជា២ដំណាក់កាល ។ ក្នុងនោះដំណាក់កាលទី១ ស្ថាបនា​ចាប់​ពី​ផ្លូវជាតិលេខ៥ សង្កាត់គីឡូម៉ែត្រលេខ៦ ខណ្ឌឬស្សីកែវ ដល់ផ្លូវលេខ៧០ ដែលមានប្រវែងជាង​៤,៦០០​ម៉ែត្រ​ ។ដំណាក់កាលទី២ ស្ថាបនាចាប់ពីផ្លូវលេខ៧០ ដល់ផ្លូវសហព័ន្ធរុស្សី ស្ថិតក្នុងសង្កាត់បឹងកក់ទី១ និងសង្កាត់​បឹង​កក់ទី២ ខណ្ឌទួលគោក។

លោកប៉ា សុជាតិវង្ស ធ្លាប់បានអះអាងហើយថា គម្រោងស្ថាបនាផ្លូវអមសងខាងផ្លូវ ដែកចាប់ពីផ្លូវលេខ៧០ ដល់ផ្លូវជាតិលេខ៥ ក្នុងខណ្ឌឬស្សីកែវនេះមិនតម្រូវឲ្យពលរដ្ឋរងផលប៉ះពាល់ ណាម្នាក់ចាកចេញពីតំបន់នេះឡើយ ដោយប្រើយុទ្ធសាស្រ្តកាត់បន្ថយផលប៉ះពាល់ឲ្យមកនៅកម្រិតទាបបំផុត។

គួរបញ្ជាក់ផងដែរថា ការអភិវឌ្ឍតំបន់នេះមានផលប្រយោជន៍ច្រើនណាស់ ដោយមិនត្រឹមតែមាន ផ្លូវស្រួលក្នុងការ​ធ្វើ​ចរា​ចរណ៍​ប៉ុណ្ណោះទេ ប៉ុន្តែអ្នកដែលនៅសល់ដីពីការអភិវឌ្ឍនិងធ្វើបណ្ណ័កម្មសិទ្ធិឲ្យថែមទៀតផង។ ចំណែក​អ្នក​ដែលរងផលប៉ះពាល់ទាំងស្រុងវិញ នឹងត្រូវចល័តទៅកន្លែងមួយ ផ្សេងទៀតប៉ុន្តែស្ថិតនៅមាត់ផ្លូវ​ដែលគ្រោងស្ថា​បនា​នេះដដែល។

អាជ្ញាធររាជធានីជារឿយៗបានជំរុញឲ្យប្រជាពលរដ្ឋដែលរងផលប៉ះពាល់ពីការអភិវឌ្ឍនេះទៅពិចារណាឲ្យបានលឿនដើម្បី ឈានទៅស្ថាបនាផ្លូវឲ្យបានឆាប់ ដើម្បីដោះស្រាយការលំបាករបស់ប្រជាពលរដ្ឋ​ដែលគ្មានផ្លូវធ្វើ​ចរាចរណ៍ត្រឹមត្រូវ ៕

អភិបាលរាជធានី8

អភិបាលរាជធានី7

អភិបាលរាជធានី6

អភិបាលរាជធានី5

អភិបាលរាជធានី4

អភិបាលរាជធានី1

អភិបាលរាជធានី2

អភិបាលរាជធានី3

មតិយោបល់