ខេត្តបន្ទាយមានជ័យ ៖ កសិករភ្ជូរដីចម្ការនៅក្បែរប្រាសាទតាស្រី ភូមិតាអុងលិចឃុំស្វាយចេក ស្រុកស្វាយចេក ខេត្តបន្ទាយមានជ័យ ចំនួន០២នាក់ ឈ្មោះមិ តឿ ភេទប្រុសអាយតុ៣៥ឆ្នាំ ជាប្តីនិងប្រពន្ធឈ្មោះហល់ សុភៀន អាយុ៣៩ឆ្នាំ នៅភូមិតាអុងលិច ឃុំស្វាយចេក ស្រុកស្វាយចេក បានយកត្រាក់ទ័រទៅភ្ជួរចម្ការ នៅចំណុចអូរត្រៀល នៅខាងលិច ឈាងខាងជើងភូមិតាអុងលិចចម្ងាយ៣គម កាលពីម៉ោងជាង៩ព្រឹកថ្ងៃទី១០ខែមិថុនាឆ្នាំ២០២១ម្សិលមិញ បានឃើញវត្តុសិល្ប:បុរាណធ្វើពីលោហ:ធាតុចំនួន១៧ដុំ/រូប ហើយក៏បានប្រគល់ជូនអាជ្ញាធរ និងបានប្រគល់បន្តដល់មន្ទីរវប្បធម៌និងវិចិត្រសិល្ប:ខេត្តបន្ទាយមានជ័យ ហើយត្រូវបានពិនិត្យនិងចុះបញ្ជី រួចរក្សាទុកនៅសារ:មន្ទីរសហគមន៍នាស្រុកស្វាយចេកនោះតែម្តង ។
លោក លឿង សុភក្តិ អភិបាលស្រុកស្វាយចេកនិងលោកដា ទឹង ប្រធានក្រុមប្រឹក្សាស្រុក បានធ្វើពិធីប្រគល់ ទទួលវត្ថុសិល្ប:បុរាណនោះហើយពីកសិករ២នាក់នោះ ។លោកនិយាយថា នៅព្រឹកថ្ងៃទី១០ខែមិថុនានេះ កសិករខាងលើបានបើកត្រាក់ទ័រភ្ជួរចម្ការដាំដំឡូងមី ហើយពីដំបូងក៏ប្រទះឃើញក្រឡ(កុលាភាជន៍)មួយចំនួន ។បន្តាប់មក ក៏ឃើញវត្ថុសិល្ប:បុរាណធ្វើលោហ: ហើយក៏ភ្ញាក់ផ្អើលលឡើងដល់កសិករនិងអ្នកភូមិឯទៀត បាននាំគ្នាធ្វើការអុជធូបទៀនបន់ស្រន់គោរពសក្ការ: ។
ដោយឮខ្ចរខ្ចាយបែបនេះ ទើបកសិករដែលភ្ជូរដីរកឃើញវត្ថុសិល្ប:ខាងលើ ក៏សម្រេចស្ម័គ្រចិត្តប្រគល់វត្ថុជូនអាជ្ញាធរ។ពោលគឺដើម្បីកុំឲ្យធ្លាក់ទៅដល់ដៃឈ្មួញ (អ្នករកស៊ីទិញ លក់ រត់ពន្ធវត្ថុសិល្ប:បុរាណ) ។
លោកយង់ តាំងគួយ ប្រធានមន្ទីរវប្បធម៌និងវិចិត្រសិល្ប:ខេត្តបន្ទាយមានជ័យរួមជាមួយអនុប្រធាន មន្ត្រីជំនាញបុរាណវិទ្យានិងលោកតាន់ ប៊ុនមីន អនុប្រធានការិយាល័យសង្គមកិច្ច សុខុមាលភាពវប្បធម៌ សាសនា កិច្ចការនារីនិងជាប្រធានសារ:មន្ទីរស្វាយចេក បានពិនិត្យ និងចុះបញ្ជីវត្ថុសិល្ប:ទាំងនោះ ហើយថា អាចមានចំណាស់ក្នុងស.វទី១០ទៅ១១ ។
វត្ថុសិល្ប:បុរាណទាំងនោះ រួមមាន ១៧ដុំ/រូបធ្វើពីលោហ:ធាតុ ក្នុងនោះមាន១/ ពុម្ពចាក់ព្រះ ចំនួន២ ។២/កណ្តឹង(ត្រួយ) ចំនួន២ ។ ៣/កង ចំនួន៩ ។៤/ ទេឥវរូបស្រី ចំនួន១ ។៥/ទេវរូបប្រុស ចំនួន១ ។៦/ពុទ្ធរូបប្រក់នាគ ចំនួន២ និង៧/ ដុំសំណ ចំនួន១០ដុំ(តូចៗ) ។
ជាមួយគ្នានោះដែរមន្ត្រីអាជ្ញាធរបានថ្លែងអំណរគុណពលរដ្ឋល្អ ដែលបានរកឃើញនិងប្រគល់វត្ថុសិល្ប:បុរាណមកអាជ្ញាធរដែនដីនិងជំនាញវប្បធម៌ដើម្បីរក្សាទុកមិនឲ្យបាត់បង់ ។ នេះជាស្មារតីស្នេហាមរតកវប្បធម័ បេតិកភ័ណ្ឌ សិល្ប:និងអត្តសញ្ញាណជាតិខ្មែរ.។
សូមបញ្ជាក់ថា៖ ការទទួលលើកនេះទៀត នាំឲ្យសារ:មន្ទីរស្វាយចេក នឹងបានទទួលការដាក់តាំងបន្ថែមរូបទើបប្រគល់ចំនួន១៧ដុំ /រូប ទៀត លើវត្ថុសិល្ប:បុរាណដែលទទួលពីពលរដ្ឋ ពីសមត្ថកិច្ចកងកម្លាំងពីអ្នកមុខសញ្ញាផ្សេងទៀត ដែលបានដាក់តាំងមានចំនួន៥២៦ដុំ /រូប /បន្ទះ ហើយនោះ ៕
ប្រភព៖ អគ្គស្នងការដ្ឋាននគរបាលជាតិ
មតិយោបល់