(ភ្នំពេញ)៖ ហាក់ស្ងប់ស្ងាត់បញ្ចេញបទចម្រៀងថ្មីៗ នៅពេលនេះ តារាចម្រៀងប្រុសស្រីពីរនាក់ គឺ សុគន្ធ ថេរ៉ាយុ និង យក់ ឋិតរដ្ឋា បានចាប់ដៃគ្នាក្នុងចម្រៀងថ្មីៗ ដើម្បីកំដរអារម្មណ៍ទស្សនិកជន ខណៈគេមិនទាន់ដឹងនៅឡើយទេថា តើចម្រៀងនោះជាប្រភេទបែបណា។ គ្រាន់តែដឹងថា ពេលនេះអ្នកគាំទ្ររបស់តារាទាំងពីរកំពុងរងចាំស្តាប់ស្នាដៃរបស់ សុគន្ធ ថេរ៉ាយុ និង យក់ ឋិតរដ្ឋា។

ដូចទស្សនិកជនបានជ្រាបហើយថា លោក សុគន្ធ ថេរ៉ាយុ គឺជាតារាចម្រៀងមួយរូបរបស់ផលិតកម្មថោន ដែលទទួលបានភាពល្បីល្បាញកាលពីប៉ុន្មានឆ្នាំមុន ប៉ុន្តែលោកបានស្ងាត់ដំណឹងទៅវិញ ប៉ុន្តែថ្មីៗនេះ លោក និង អ្នកនាង យក់ ឋិតរដ្ឋា ស្រាប់តែប្រកាសនៅលើគណនីហ្វេសប៊ុករៀងខ្លួនថា នឹងចូលមកបំពេរអារម្មណ៍អ្នកគាំទ្រជាថ្មីម្ដងទៀត តាមរយៈស្នាដៃរួមគ្នា។

លោក សុគន្ធ ថេរ៉ាយុ បានសរសេរសារលើហ្វេសប៊ុកថា «New song with jj soon» ។ ចំណែកឯអ្នកនាង យក់ ឋិតរដ្ឋា វិញ ក៏បានបញ្ជាក់យ៉ាងដូច្នេះដែរថា «ជិតមានបទចំរៀងថ្មីៗសំរាប់ការទន្ទឹងរង់ចាំរបស់បងប្អូនហើយ» ។