ភ្នំពេញ៖ លោកឧត្តមសេនីយ៍ឯក ម៉ៅ សុផាន់ មេបញ្ជាការកងពលតូចលេខ៧០ បានឲ្យដឹងនៅព្រឹកថ្ងៃទី១០ ខែសីហា ឆ្នាំ២០២១នេះថា កងពលតូចលេខ៧០ នឹងដំណើរការចាក់វ៉ាក់សាំងដូសទី៣ ឬដូសជំរុញ ប្រភេទ Astrazeneca ជូនកងទ័ព និងគ្រួសារកងទ័ព នៅថ្ងៃទី១១ ខែសីហាស្អែកនេះតទៅ។
លោកឧត្តមសេនីយ៍ឯក ម៉ៅ សុផាន់ បានអះអាងទៀតថា ដំណើរការចាក់វ៉ាក់សាំង Astrazeneca ជាដូសជំរុញ នៅកងពលតូចលេខ៧០នេះ នឹងត្រូវធ្វើឡើងរយ:ពេល១សប្ដាហ៍ពេញ។ ការចាក់នេះធ្វើនៅបញ្ជាការដ្ឋានកងពលតូចលេខ៧០, មូលដ្ឋានទ័ពរបស់កងពលតូចលេខ៧០ នៅខេត្តព្រះសីហនុ, តាមសាលាវរសេនាតូច, សាលាហ្វឹកហ្វឺនតេជោសែនភ្នំម្រះព្រៅ និងសាលាហ្វឹកហ្វឺនតេជោសែន ជុំគីរី។
សូមជម្រាបថា សម្តេចតេជោ ហ៊ុន សែន បានបញ្ជាឲ្យគណ:កម្មការជាតិចាក់វ៉ាក់សាំងកូវីដ-១៩ បើកយុទ្ធនាការចាក់វ៉ាក់សាំងដូសទី៣ ជូនមន្រ្តីពាក់ព័ន្ធជួរមុខ នៅខេត្តជាប់ព្រំដែនកម្ពុជា-ថៃជាបន្ទាន់ ខណ:ដែលពួកគេប្រឈមនឹងការឆ្លងមេរោគថ្មី Delta ក្រោយពលករជាច្រើនត្រឡប់ពីប្រទេសថៃ ចូលស្រុកខ្មែរវិញ។ ដោយឡែក ការចាក់ជូនកងទ័ព និងគ្រួសារកងទ័ព ត្រូវប្រគល់សមត្ថកិច្ចជូនក្រសួងការពារជាតិ។
ការចាក់ដូសទី៣នេះ គឺប្រើប្រាស់វ៉ាក់សាំង AstraZeneca ដែលជាដូសជំរុញសម្រាប់អ្នកដែលបានចាក់វ៉ាក់សាំងចិនស៊ីណូហ្វាម ឬស៊ីណូវ៉ាក់រួចហើយ។ ជាមួយនឹងការសម្រេចចាក់ដូសទី៣នេះ សម្ដេចតេជោ ហ៊ុន សែន ក៏បញ្ជាឲ្យស្ថាប័នពាក់ព័ន្ធ ត្រូវរួមគ្នាខិតខំស្វែងរកទិញវ៉ាក់សាំង AstraZeneca បន្ថែមទៀតដើម្បីបន្តចាក់ជូនប្រជាពលរដ្ឋទូទាំងប្រទេសទាំងអស់ផងដែរ៕
មតិយោបល់