ទីភ្នាក់ងារស៊ើបការសម្ងាត់បានឲ្យដឹងថា វាមិនអាចទៅរួចក្នុងការស្ទង់ដឹងពីទំហំទឹកប្រាក់ឲ្យប្រាកដរបស់ក្រុមតាលីបង់ ដែលរៃអង្គាសបាននោះទេ។ របាយការណ៍មួយស្តីពីឯករាជ្យភាពនៃហិរញ្ញវត្ថុដែលគេរកឃើញ បានបង្ហាញថា ក្រុមបះបោរនេះមានទឹកប្រាក់ច្រើនខ្លាំង ក្នុងនោះទឹកប្រាក់រៃអង្គាសបានមានចំនួនប្រមាណពី ៣០០លានដុល្លារ ទៅ ១,៦ពាន់លានដុល្លារ ក្នុងមួយឆ្នាំ។
របាយការណ៍របស់អង្គការសហប្រជាជាតិ នាខែមិថុនា ឆ្នាំ២០២១ ដែលផ្អែកលើទីភ្នាក់ងារស៊ើបការសម្ងាត់របស់ប្រទេសជាសមាជិក បានបង្ហាញថា ថវិកាភាគច្រើនរបស់ក្រុមតាលីបង់បានមកពីសកម្មភាពឧក្រិដ្ឋនានា ដូចជាផលិតផលអាភៀន ការជួញដូរគ្រឿងញៀន ការគំរាមទារប្រាក់ និងការចាប់ជម្រិតមនុស្សយកប្រាក់ជាដើម។
ទីភ្នាក់ងារស៊ើបការសម្ងាត់មួយបានឲ្យដឹងថា ក្រុមតាលីបង់អាចរកចំណូលបានដល់ ៤៦០ លានដុល្លារ តាមរយ:ការជួញដូរគ្រឿងញៀនតែមួយមុខ។
របាយកាណ៍របស់អង្គការសហប្រជាជាតិ ក៏បានឲ្យដឹងទៀតថា មេដឹកនាំក្រុមតាលីបង់ក៏អាចរកចំណូលបន្ថែម តាមរយ:ការទាញយកផលពីធនធានធម្មជាតិនៅក្នុងតំបន់ ដែលខ្លួនបានក្តោបក្តាប់ដោយក្នុងនោះក្រុមនេះរកបានប្រាក់ប្រមាណ ៤៦៤លានដុល្លារ កាលពីឆ្នាំ ២០២០ តាមរយ:ការរុករករ៉ែ។
មេដឹកនាំក្រុមតាលីបង់ក៏ទទួលបានប្រាក់ពីការបរិច្ចាគនានា ដែលអង្គការសហប្រជាជាតិបានចាត់ទុកថាជា «បណ្តាញនៃមូលនិធិសប្បុរសធម៌របស់អង្គការមិនមែនរដ្ឋាភិបាល» និងពីក្រុមគាំទ្របេសកកម្មរបស់ក្រុមតាលីបង់ដែលមានទ្រព្យសម្បត្តិហូរហៀរ។
ដោយឡែក មន្រ្តីអាមេរិក ក៏បាននិយាយក្នុងរយ:ពេលជាច្រើនឆ្នាំមកនេះថា ក្រុមតាលីបង់ក៏បានទទួលជំនួយជាថវិកា អាវុធ និងការបណ្តុះបណ្តាលនានាពីប្រទេសរូស្ស៊ីផងដែរ។
ក្រុមអ្នកវិភាគផ្សេងទៀតយល់ឃើញថា ក្រុមតាលីបង់នៅតែទទួលជំនួយជាថវិកាពីប្រទេសបាគីស្ថាន ហើយជំនួយខ្លះពីប្រទេសអ៊ីរ៉ង់។
ទោះជាយ៉ាងណាក៏ដោយ នៅពេលដែលក្រុមតាលីបង់អាចនឹងមានថវិកាគ្រប់គ្រាន់ក្នុងការដណ្តើមកាន់កាប់ប្រទេសអាហ្វហ្គានីស្ថានទាំងមូល ដោយកម្លាំងយោធាបាន នោះគេនឹងនៅតែចោទសួរថា តើក្រុមនេះអាចមានថវិកាគ្រប់គ្រាន់ដើម្បីដឹកនាំប្រទេសអាហ្វហ្គានីស្ថានដោយខ្លួនឯងដែរឬយ៉ាងណា។
យោងតាមទិន្នន័យចុងក្រោយបង្អស់របស់ធនាគារពិភពលោក រដ្ឋាភិបាលអាហ្វហ្គានីស្ថានចំណាយថវិកាប្រមាណ ១១ ពាន់លានដុល្លារក្នុងឆ្នាំ ២០១៨ ដោយក្នុងនោះ ៨០ភាគរយ បានមកពីជំនួយបរទេស។
កាលពីខែមីនាកន្លងទៅនេះ លោក John Sopko អគ្គអធិការពិសេសរបស់សហរដ្ឋអាមេរិកទទួលបន្ទុកលើកិច្ចការស្តារឡើងវិញក្នុងប្រទេសអាហ្វហ្គានីស្ថាន បាននិយាយថា៖ «សូម្បីតែក្រុមតាលីបង់ក៏ដឹងដែលថា ប្រទេសអាហ្វហ្គានីស្ថានចាំបាច់ត្រូវការជំនួយបរទេស» សម្រាប់ការស្តារប្រទេសឡើងវិញ។
មតិយោបល់