អគ្គលេខាធិការរងអង្គការសហប្រជាជាតិ ទទួលបន្ទុកកិច្ចការមនុស្សធម៌ លោក Martin Griffiths បានអញ្ជើញទៅដល់ក្រុងកាប៊ុលកាលពីថ្ងៃអាទិត្យទី ៥កញ្ញា និងបន្តស្ថិតនៅទីនោះជាច្រើនថ្ងៃទៀត ដើម្បីជួបពិភាក្សាជាមួយមេដឹកនាំតាលីបង់ ដោះស្រាយវិបត្តិមនុស្សធម៌ដ៏ធ្ងន់ធ្ងរនៅអាហ្វហ្កានីស្ថាន។
នៅក្នុងសេចក្តីថ្លែងការណ៍ លោកអគ្គលេខាធិការរងបានបញ្ជាក់ជាថ្មីថា សហគមន៍អន្តរជាតិនឹងបន្តផ្តល់ជំនួយមនុស្សធម៌ដល់អាហ្វហ្កានីស្ថាន ដោយគ្មានលម្អៀង និងដោយឯករាជ្យ តែគ្រប់ភាគីនៅអាហ្វហ្កានីស្ថាន ត្រូវគោរពសិទ្ធិស្ត្រី ទាំងក្នុងរង្វង់ប្រជាជនផង ទាំងក្នុងរង្វង់ក្រុមការងារមនុស្សធម៌ផង។
ចំណែកតាលីបង់វិញ ក៏បានសន្យា ធានារ៉ាប់រង ការពារសន្តិសុខ និងសុវត្ថិភាព ជូនក្រុមការងារមនុស្សធម៌ផង និង ធានាសេរីភាពនៃការធ្វើដំណើរ ធ្វើបំលាស់ទី របស់ក្រុមការងារមនុស្សធម៌ស្រី-ប្រុស ក្នុងបុព្វហេតុចែកចាយជំនួយដល់ពលរដ្ឋអាហ្វហ្កានីស្ថានតាមសេចក្តីត្រូវការផង។ នេះបើតាមសេចក្តីថ្លែងការណ៍របស់អង្គការសហប្រជាជាតិដដេល។ អ្នកនាំពាក្យតាលីបង់ក៏បានបញ្ជាក់ដូចគ្នា ថាតាលីបង់អរគុណ និងធានាសហការព្រមទាំងផ្តល់ទីតាំងចាំចាច់ ដើម្បីឱ្យដំណើរការចែកចាយជំនួយមនុស្សធម៌អាចប្រព្រឹត្តទៅបានដោយរលូន។
បើតាមអង្គការសហប្រជាជាតិ ក្នុងចំណោមប្រជាពលរដ្ឋអាហ្វហ្កានីស្ថានសរុបជាង៣៨លាននាក់ ពាក់កណ្តាលត្រូវការជំនួយ។ ហើយជាងពាក់កណ្តាលនៃក្មេងអាយុក្រោយម៥ឆ្នាំ ប្រឈមនឹងភាពអត់ឃ្លាន នៅឆ្នាំខាងមុខ។ អាហ្វហ្កានីស្ថានរស់រំពឹងនឹងជំនួយអន្តរជាតិ តាំងពីមុនតាលីបង់ដណ្តើមអំណាចបានស្រាប់ទៅហើយ។ ៤០%នៃផលិតផលសរុបក្នុងស្រុកជាជំនួយហិរញ្ញវត្ថុបរទេស។ នៅថ្ងៃទី ១៣ កញ្ញាខាងក្រោម លោកអគ្គលេខាធិការអង្គការសហប្រជាជាតិ Antonio Guterres នឹងដឹកនាំជំនួបប្រជុំមួយនៅទីក្រុងហ្សឺណែវ ដើម្បីស្វែងរកជំនួយបន្ថែមមកជួយអាហ្វហ្កានីស្ថាន៕
មតិយោបល់