នៅក្នុងប្រទេសភូមា ជាង ៣ ខែក្រោយរដ្ឋប្រហារ ស្ថានការណ៍នៅតែស្ថិតក្នុងភាពវឹកវរ និងកំពុងតែឈានដល់របត់ថ្មីមួយទៀត ហើយនោះ គឺការប៉ុនប៉ង រំលាយគណបក្សសម្ព័ន្ធជាតិដើម្បីប្រជាធិបតេយ្យរបស់លោកស្រី អ៊ុងសានស៊ូ ជី។
នៅពេលថ្មីៗនេះ របបយោធាបានគំរាមរំលាយគណបក្សរបស់លោកស្រី ស៊ូជី ជុំវិញរឿងក្លែងបន្លំសន្លឹកឆ្នោត។ ប្រធានគណ:កម្មាធិការរៀបចម្ការបោះឆ្នោតរបស់ប្រទេសភូមាលោក ថេន សៃ បាននិយាយនៅថ្ងៃសុក្រម្សិលមិញថា ដំណើរការស៊ើបអង្កេតពាក់ព័ន្ធករណីលួចបន្លំនៅក្នុងការបោះឆ្នោតសភាកាលពីខែ វិច្ឆិកា ឆ្នាំ២០២០ ជិតរួចរាល់ហើយ។
តាមរយ:វីដេអូដែលត្រូវបានបង្ហោះនៅលើគណនីហ្វេសប៊ុករបស់ប្រព័ន្ធផ្សព្វផ្សាយក្នុងស្រុកមួយរបស់ភូមា លោកថេន សៃ បានលើកឡើងថា គណ:កម្មាធិការនឹងវិភាគហើយពិចារណាចាត់វិធានការ ចំពោះគណបក្សរបស់លោកស្រី ស៊ូជី ដែលបានប្រព្រឹត្តសកម្មភាពខុសច្បាប់។ សំណួរដែលគណ:កម្មាធិការរៀបចម្ការបោះឆ្នោតភូមាចោទសួរឡើងនោះគឺថាតើគួររំលាយគណបក្សសម្ព័ន្ធជាតិដើម្បីប្រជាធិបតេយ្យ ឬក៏ត្រូវចោទប្រកាន់អ្នកដែលបានប្រព្រឹត្តអំពើនេះ ថាជាជនក្បត់ជាតិ?
ក្រោមហេតុផលថា គណបក្សរបស់លោកស្រីស៊ូជី បានលួចបន្លំសន្លឹកឆ្នោតនេះ មេដឹកនាំយោធាលោកឧត្តមសេនីយ៍ មីនអ៊ុង ឡាំង បានបង្ហាញថាវាគឺជារឿងត្រឹមត្រូវហើយ ដែលកងទ័ពភូមាធ្វើរដ្ឋប្រហារដណ្តើមអំណាចពីស៊ីវិល។
ជាការគួរឲ្យកត់សម្គាល់ដែរ គេសង្កេតឃើញថា លោកមីនអ៊ុង ឡាំង កាន់តែបង្ហាញមហិច្ឆតាចង់គ្រប់គ្រងអំណាចទាំងស្រុង និងរយ:ពេលយូរនៅភូមា។ ជាក់ស្តែង កាលពីថ្ងៃព្រហស្បតិ៍ ទី ២០ ឧសភា ប្រព័ន្ធផ្សព្វផ្សាយក្នុងស្រុកមួយរបស់ភូមាបានរាយការណ៍ថា របបយោធាបានសម្រេចដកចេញនូវលក្ខខណ្ឌចូលនិវត្តន៍នៅវ័យ ៦៥ ឆ្នាំ ដែលជាកាតព្វកិច្ចសម្រាប់មេដឹកនាំយោធា។
ទាក់ទងចំណុចនេះ គួរបញ្ជាក់ថា លោកលោកឧត្តមសេយ៍ មីន អ៊ុងឡាំង នឹងឈានចូលវ័យ ៦៥ ឆ្នាំ នៅខែកក្កដាខាងមុខនេះ។ ដូច្នោះហើយ គេអាចយល់ថា ការលុបចោលនូវអាយុចូលនិវត្តន៍សម្រាប់មេដឹកនាំយោធា គឺជាការបើកផ្លូវអនុញ្ញាតឲ្យ លោកមីន អ៊ុងឡាំង អាចនៅបន្តកាន់អំណាចយូរបន្តទៅមុខទៀត៕
មតិយោបល់