ក្រោយពីក្រុមហ៊ុន ជីប ម៉ុង រីថែល ប្រកាសជាផ្លូវការកាលពីថ្ងៃទី៥ ខែកុម្ភ: ឆ្នាំ២០២១ ពីការបើកឱកាសឱ្យដៃគូពាណិជ្ជកម្ម ម្ចាស់ម៉ាកផលិតផលល្បីៗ ភោជនីយដ្ឋាន ហាងលក់អាហារ និងភេសជ្ជ: សម្ភារ:ប្រើប្រាស់ ក៏ដូចជាសេវាកម្មកម្សាន្តទាំងក្នុងនិងក្រៅស្រុក ចូលមកជួលទីតាំងធ្វើអាជីវកម្មក្នុងផ្សារទំនើបខ្នាតយក្ស ជីប ម៉ុង ២៧១ មេហ្គាម៉ល ពេលនេះទីតាំងដល់ទៅ៥០ភាគរយនៃផ្សារទំនើបដ៏ធំអស្ចារ្យមួយនេះមានម្ចាស់គ្រប់គ្រងហើយ។
ផ្សារទំនើប ជីប ម៉ុង ២៧១ មេហ្គាម៉ល ដែលនឹងក្លាយជាផ្សារទំនើបខ្នាតយក្សដំបូងគេបង្អស់នៅកម្ពុជា ត្រូវបានគេរំពឹងទុកថានឹងបើកដំណើរការក្នុងឆ្នាំ២០២២ខាងមុខនេះ ស្របពេលដែលអគារផ្សារទាំងមូលនៅតែបន្តការសាងសង់យ៉ាងសស្រាក់សស្រាំជារៀងរាល់ថ្ងៃ។
នៅក្នុងពិធីប្រកាសស្វែងរកដៃគូពាណិជ្ជកម្មសម្រាប់ផ្សារទំនើបខ្នាតយក្ស ជីប ម៉ុង ២៧១ មេហ្គាម៉ល លោក Arnaud DUFRESNE អគ្គនាយកក្រុមហ៊ុន ជីប ម៉ុង រីថែល បានឱ្យដឹងថា៖ «ទីតាំងផ្សារទំនើប ជីប ម៉ុង ២៧១ មេហ្គាម៉ល មានសក្តានុពលខ្លាំងណាស់សម្រាប់ការពង្រីកអាជីវកម្មបែបទំនើប ដើម្បីឆ្លើយតបទៅនឹងតម្រូវការរបស់ប្រជាពលរដ្ឋក្នុងរាជធានីភ្នំពេញប្រមាណជិត៣លាននាក់ ក៏ដូចជាពលរដ្ឋដែលរស់នៅក្នុងតំបន់ជុំវិញទីតាំងមួយនេះផងដែរ ខណ:ដែលជីវភាពរបស់ពួកគេក៏កាន់តែប្រសើរឡើងជាលំដាប់»។
លោកក៏មានការរំពឹងទុកយ៉ាងខ្ពស់ថា ផ្សារទំនើបមួយនេះនឹងនាំមកនូវចំនួនអតិថិជនដ៏ច្រើនលើសលុប ទីមួយគឺដោយសារទីតាំងដ៏ល្អឥតខ្ចោះ ស្ថិតនៅក្នុងគម្រោង លែនម៉ាក ២៧១ របស់ ជីប ម៉ុង លែន ចំកណ្ដាលទីប្រជុំជន និងស្ថិតនៅក្បែរផ្លូវសំខាន់ៗដូចជា ផ្លូវ២៧១ ផ្លូវ៣៧១ និងផ្លូវ៦០ម៉ែត្រ បូករួមជាមួយយុទ្ធសាស្រ្តទីផ្សារដ៏ឆ្លាតវៃ ការជ្រើសរើសនិងរៀបចំទីតាំងជាមួយដៃគូពាណិជ្ជកម្មដ៏ត្រឹមត្រូវ និងកិច្ចសហការគ្នាដ៏រឹងមាំរវាងផ្សារទំនើប ជីប ម៉ុង ២៧១ មេហ្គាម៉ល ជាមួយនឹង ជីប ម៉ុង លែន ក៏ដូចជាពាណិជ្ជកម្មដទៃទៀតជាង១០របស់ក្រុមហ៊ុន ជីប ម៉ុង។
ជាមួយនឹងក្ដីជឿជាក់នេះ ក្រុមហ៊ុន ជីប ម៉ុង រីថែល នៅតែបន្តទទួលស្វាគមន៍ដៃគូពាណិជ្ជកម្មថ្មីៗបន្ថែមទៀតមកពីគ្រប់ទិសទីទាំងអស់ជុំវិញពិភពលោកដើម្បីមកវិនិយោគ និងជួលទីតាំងលក់ផលិតផល ឬសេវាកម្មនៅក្នុងផ្សារទំនើបខ្នាតយក្សដំបូងគេបង្អស់នៅកម្ពុជាមួយនេះ។
មតិយោបល់