ភ្នំពេញ ÷ បុរសម្នាក់ស្រវឹងស្រាធ្លាក់ភ្នែក បានបើករថយន្តកាមរីហាយព្រីតមួយគ្រឿង ក្នុងល្បឿនលឿនបានរេចង្កូតជ្រុល ទៅបុកជាមួយម៉ូតូចំពីមុខពេញទំហឹង បណ្តាលឲ្យម៉ូតូខ្ទេចទាំងស្រុង និងបន្តល្បឿនទៅបុករះរថយន្តស៊េរីទំនើប៣គ្រឿងទៀត ចតនៅមុខផ្ទះរងការខូចខាតយ៉ាងធ្ងន់ធ្ងរ។

ហេតុការណ៍គ្រោះថ្នាក់ចរាចរណ៍នេះដែរ បានកើតឡើងកាលពីវេលាម៉ោង ១០និងទី៤០ នាទីយប់ថ្ងៃទី២៣ ខែវិច្ឆិកា ឆ្នាំ ២០២១ ស្ថិតនៅតាមបណ្ដោយផ្លូវ ១៦៣ ក្នុងសង្កាត់ទួលស្វាយព្រៃទី១ ខណ្ឌបឹងកេងកង រាជធានីភ្នំពេញ។

បញ្ជាក់រថយន្តស៊េរីទំនើប៣គ្រឿង រងការខូចខាតមាន ៖ រថយន្តម៉ាក Lexus RX200t ខូចខាតមួយគ្រឿង ២-រថយន្តម៉ាកLexusRX570 និងរថយន្តម៉ាក BMW13។

ប្រភពព័ត៌មានពីពលរដ្ឋនៅកន្លែងកើតហេតុ បានប្រាប់ឲ្យដឹងថា មុនកើតហេតុគេបានឃើញបុរសម្នាក់ ជាជនរងគ្រោះបានជិះម៉ូតូម៉ាកហុងដាឌ្រីមសង់សេ១២៥ ស៊េរីឆ្នាំ២០១៣មួយគ្រឿង ពណ៌ខ្មៅពាក់ផ្លាកលេខភ្នំពេញ1BO-9563 ជិះតាមបណ្ដោយផ្លូវ១៦៣ ក្នុងទិសដៅពីត្បូងមកជើងក្នុងល្បឿនលឿនមធ្យម ខណៈមកដល់ចំណុចកើតហេតុ ស្រាប់តែមានរថយន្តបង្កម៉ាកកាមរីហាយប្រ៊ីត ពណ៌ទឹកប្រាក់ពាក់ផ្លាកលេខ ភ្នំពេញ 2V-7374 បើកបរដោយបុរសម្នាក់ក្នុងស្ថានភាពស្រវឹង ធ្វើដំណើរបញ្រ្ចាសទិសគ្នាជាមួយនិងម៉ូតូ ពីជើងមកត្បូងក្នុងល្បឿនលឿន ក៏បានរេចង្កូតរថយន្តទៅបុកចំពីមុខម៉ូតូពេញទំហឹង ប៉ើងជនរងគ្រោះទៅមុខជាច្រើនម៉ែត្រ បណ្តាលឲ្យបាក់ជើងមួយចំហៀងយ៉ាងធ្ងន់ធ្ងរ ហើយភ្លាមៗនោះដែរ ម្ចាស់រថយន្តបង្កក៏ត្រូវបាន សមត្ថកិច្ចប៉ុស្តិ៍នគរបាលរដ្ឋបាលសង្កាត់ទួលស្វាយព្រៃទី១ ឃាត់ខ្លួន នាំយកទៅធ្វើការសួរនាំ និងចាត់ការបន្ត។

ក្រោយកើតហេតុខាងលើសមត្ថកិច្ចមូលដ្ឋាន សហការជាមួយនឹងផ្នែកជំនាញចរាចរណ៍ ចុះមកដល់រួចក៏ទំនាក់ទំនងទៅផ្នែកជំនាញចរាចរណ៍ក្រុង ឱ្យចុះមកវាស់វែងយករថយន្តស្ទូចមកស្ទូច យករថយន្តបង្កនិងរថយន្តស៊េរីនំនើប៣គ្រឿងទៀត យកទៅរក្សាទុកនៅខាងការិយាល័យចរាចរណ៍ជំនាញផ្លូវគោក នៃស្នងការនគរបាលរាជធានីភ្នំពេញ រងចាំដោះស្រាយនៅពេលក្រោយ៕