ភ្នំពេញ: គ្រោះថ្នាក់ចរាចរណ៍មួយបានបង្ករឡើងដោយខ្លួនឯង បន្ទាប់ពីយុវជន២នាក់ សង្ស័យស្រវឹង បានជិះម៉ូតូម៉ាកMSX ក្នុងល្បឿនលឿនជ្រុល​ទៅបុកជាមួយនឹងបង្គោលភ្លើងបំភ្លឺផ្លូវយ៉ាងពេញលាន់ឭដូចរន្ទះ បណ្តាលឲ្យយុវជនម្នាក់បោកក្បាលស្លាប់នៅនឹងកន្លែង ចំណែកម្នាក់ទៀតរងរបួសធ្ងន់ ត្រូវបានគេបញ្ជូន​ទៅសង្គ្រោះបន្ទាន់នៅមន្ទីរពេទ្យ ។ ហេតុការណ៍នេះបានកើតឡើងកាលពីវេលាម៉ោង ៣និង ៣០នាទី ទាបភ្លឺថ្ងៃទី១៤ ខែកញ្ញា ឆ្នាំ ២០១៦ ស្ថិតនៅចំណុចតាម​បណ្តោយ​ផ្លូវព្រះមុនីវង្ស ក្នុងសង្កាត់បឹងកេងកងទី១ ខណ្ឌចម្ការមន រាជធានីភ្នំពេញ ។

ប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ គេបានឃើញយុវជនទាំង២នាក់ខាងលើ ដែលមិនទាន់ត្រូវបានគេស្គាល់ពីអត្តសញ្ញាណ បានជិះម៉ូតូមួយ​គ្រឿងម៉ាកMSX ពណ៌ស ពាក់ស្លាកលេខ ភ្នំពេញ 1FG-8607 បានជិះរ៉េចង្កូតដងពេញផ្លូវសង្ស័យថាស្រវឹង ថែមទាំងបើកបរក្នុងល្បឿនលឿនទៀតផង។ លុះបានមកដល់​ចំណុចកើតហេតុ ស្រាប់តែម៉ូតូខាងលើបានជ្រុលទៅបុកជាមួយនិងបង្គោលភ្លើងសម្រាប់បំភ្លឺផ្លូវយ៉ាងពេញទំហឹងលាន់ឭដូចរន្ទះ បណ្តាលឲ្យយុវជនម្នាក់ខ្ទាតបោកទៅដងផ្លូវ បែកក្បាលស្លាប់ភ្លាមៗនៅនឹងកន្លែង ចំណែកម្នាក់ទៀតរបួសធ្ងន់បាក់ដងកាំបិត និងត្រូវបានរថយន្តសាមុយដឹកយកទៅសង្គ្រោះនៅមន្ទីរពេទ្យភ្លាមៗផងដែរ ចំណែកឯម៉ូតូវិញ​រងការខូចខាតទាំងស្រុង ។

ក្រោយពីហេតុការណ៍នេះបានកើតឡើង សមត្ថកិច្ចនគរបាលចរាចរណ៍ខណ្ឌចម្ការមន ចុះមកធ្វើការវាស់វែងដល់កន្លែងកើតហេតុ និងបាននាំយកម៉ូតូរបស់ជនរងគ្រោះ​យកទៅរក្សាទុកនៅអធិការដ្ឋាននគរបាលខណ្ឌចម្ការមន ដើម្បីរង់ចាំក្រុមគ្រួសារមកទទួលយកទៅវិញ ចំណែកសាកសពជនរងគ្រោះត្រូវបានសមត្ថកិច្ចដឹកយកទៅតម្កល់ទុក រង់ចាំសាច់ញាតិមកទទួលយកទៅធ្វើបុណ្យតាមប្រពៃណី ៕