ភ្នំពេញ: អាជ្ញាធររាជធានីភ្នំពេញបានដាក់ភ្លើងបំភ្លឺតាមដងផ្លូវទាំងអស់ទូទាំងរាជធានីបានចំនួន៥០ភាគរយហើយ ដើម្បីបង្កលក្ខណ:ងាយស្រួលដល់ប្រជាពលរដ្ឋបានធ្វើចរាចរណ៍នៅពេលយប់ប្រកបដោយសុវត្ថិភាព។
អភិបាលរាជធានីភ្នំពេញលោក ប៉ាសុជាតិ វង្ស បានអះអាងថា យ៉ាងយូរបំផុតចាប់ពីឆ្នាំក្រោយនេះទៅផ្លូវទាំងអស់ នៅទូទាំងរាជធានីភ្នំពេញនឹងមានភ្លើងបំភ្លឺផ្លូវព្រោងព្រៀតនាពេលរាត្រីដើម្បីលើកកម្ពស់សោភណ័ភាពទីក្រុងឲ្យកាន់តែស្រស់ស្អាត។ ចំណែកនៅសល់ជាង៥០ភាគរយទៀត ក្នុងចំណោមបង្គោលភ្លើងទាំងជាង ១២០០០ដើម នៅតាមផ្លូវនានាទូទាំងរាជធានីភ្នំពេញ នឹងសម្រុកធ្វើឲ្យហើយឲ្យបានមុនពិធីបុណ្យចូលឆ្នាំខ្មែរខាងមុខនេះដែរ។
អភិបាលរាជធានីភ្នំពេញបានបញ្ជាក់ថា អ្វីដែលនៅសេសសល់នេះដោយសារតែក្រុមអ្នក ជំនាញត្រូវដោះដូរបង្គោលភ្លើងថ្មី រួមទាំងប្រពន្ធ័ខ្សែភ្លើងកប់នៅក្នុងដីដែលមានលក្ខណ:ពុកផុយដែលទាមទារឲ្យមានការប្រើប្រាស់រយ:ពេលយូរ។យ៉ាងណាក៏ដោយលោកអភិបាលអះអាងថា ការបំភ្លឺភ្លើងសាធារណ:នៅតាមដងផ្លូវនាពេលយប់នេះមាន សារ:សំខាន់ណាស់ដែលមិនត្រឹមតែឲ្យបានពលរដ្ឋបានធ្វើដំណើរបានដោយស្រួលប៉ុណ្ណោះទេ ប៉ុន្តែវាបានជួយកាត់បន្ថយបញ្ហាចោរកម្ម និងបទល្មើសផ្សេងៗជាច្រើនទៀតផងពិសេសនឹងជួយឲ្យសមត្ថកិច្ចអាចតាមចាប់មុខសញ្ញាបទឧក្រិដ្ឋណាមួយបានទាន់ពេលវេលា ដោយសារតែបង្គោលភ្លើងនេះក៏បំពាក់កាមេរ៉ាសុវត្ថិភាពផងដែរ។
លោកអភិបាលរាជធានី បានអះអាងបែបនេះ នៅក្នុងវេទិកាសាធារណ:នៅក្នុងខណ្ឌចម្ការមន កាលពីព្រឹកថ្ងៃទី៥ ខែតុលានៅកោះពេជ្រ ស្ថិតក្នុងសង្កាត់ទន្លេបាសាក់ ខណ្ឌចម្ការមន ក្រោមអធិបតីភាពលោកម៉ប់ សារិន ប្រធានក្រុមប្រឹក្សារាជធានីភ្នំពេញ លោកប៉ា សុជាតិវង្ស អភិបាលរាជធានីភ្នំពេញ និងមានការចូលរួមពី មន្ទីរអាជ្ញាធរដែនដី រួមនឹងប្រជាពលរដ្ឋរាប់រយនាក់។
លោកសុខ រឿន ដែលជាប្រជាពលរដ្ឋរស់នៅក្នុងរាជធានីភ្នំពេញបានឲ្យដឹងថា ការបំភ្លឺផ្លូវសាធារណ: នាពេលរាត្រីនេះសម្រាប់តំបន់កណ្តាលក្រុងពុំមានចោទជាបញ្ហាទេ ប៉ុន្តែផ្លូវនៅតំបន់ ជាយក្រុងជាយវិញភាគច្រើនមិនទាន់មានភ្លើងបំភ្លឺផ្លូវឡើយ ដែលធ្វើឲ្យប្រជាពលរដ្ឋធ្វើដំណើរ ជួបការលំបាកទាំងបញ្ហាគ្រោះថ្នាក់ចរាចរណ៍ និងបញ្ហាសន្តិសុខសុវត្ថិភាពថែមទៀតផង។
សូមបញ្ជាក់ថា នៅទូទាំងរាជធានីភ្នំពេញមានផ្លូវទាំងអស់ជិត៥០០ផ្លូវក្នុងនោះមន្រ្តីជំនាញ បានបំពាក់ប្រពន្ធ័អំពូលភ្លើងថ្មីបានចំនួន១៣៣ផ្លូវ ចំណែកច្រកផ្លូវតូចៗចូលទៅក្នុង ភូមិនឹងត្រូវអនុវត្តនៅពេលក្រោយបញ្ចប់គម្រោងនេះ៕
មតិយោបល់